Կառավարությունը հանում է կորոնավիրուսով պայմանավորված հակահամաճարակային մի շարք սահմանափակումներ՝ հաշվի առնելով երկրում հիվանդության կայուն վիճակը և աշխարհում համավարակի նվազման տեմպերը։
Ըստ այդմ, մայիսի1-ից Հայաստան մուտք գործողներին ՊՇՌ թեստի և պատվաստման սերտեֆիկատների պահանջ չի ներկայացվի։ Վերոնշյալ սերտեֆիկատները չեն պահանջվի նաև ՔԿՀ-ներում և Պաշտպանության նախարարության զինված ուժերում՝ արձակուրդ մեկնելիս կամ տեսակցությունների ժամանակ։
Վերացվեց նաև դպրոցներում, մանկապարտեզներում և այլ վայրերում միջոցառումների ժամանակ 1․5 մետր հեռավորություն պահպանելու արգելքը, և աշխատանքի վայրում 7 օրը մեկ ՊՇՌ թեստի կամ պատվաստման սերտեֆիկատ ներկայացնելու պահանջը։
Առողջապահության նախարար Անահիտ Ավանեսյանի խոսքով՝ վերջին 14 օրվա ընթացքում արձանագրվել է հիվանդության144 դեպք, ինչը նախորդ նույն ժամանակահատվածի համեմատ նվազել է 33 տոկոսով։ Ըստ նախարարի, վերջին ամսվա ընթացքում նկատվում է նաև մահվան դեպքերի կտրուկ նվազում 14 օրերի ընթացքում ընդամենը մեկ մահ է գրանցվել։
