«Շրջակա միջավայրի աղտոտման համար վճարվող բնապահպանական հարկի գումարների նպատակային և հասցեական օգտագործման գործող համակարգի բարելավումը շարունակական գործընթաց է: Այս մասին հայտնում է Շրջակա միջավայրի նախարար Հակոբ Սիմիդյանը։
Հավելելով, որ «Ընկերությունների կողմից վճարվող բնապահպանական հարկի նպատակային օգտագործման մասին» օրենքն ընդունվել է 2001թ., և ժամանակի թելադրանքով հարկ է առաջացել կատարել փոփոխություններ՝ կարգավորումները համապատասխանեցնելով «Նորմատիվ իրավական ակտերի մասին» օրենքի պահանջներին:
Առաջարկվող փոփոխությունները նախարարը ներկայացրել է Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի ապրիլի 27-ի նիստում։Նաև Սիմիդյանը նշել է, որ շրջակա միջավայրի պահպանությանն ուղղված ծրագրերի արդյունավետության մակարդակի բարձրացման նպատակով անհրաժեշտ է սահմանել միջոցառումների առավելագույն հնարավոր հստակ ցանկ: Այն հնարավորություն կտա համայնքներին սահմանափակ ռեսուրսներով մշակել և իրականացնել առավել նպատակային և հասցեական ծրագրեր:Նախարարն ընդգծել է՝ նախագիծը ստացել է դրական եզրակացություն:
