ԵՄ արտաքին քաղաքականության ծառայության ղեկավար Ժոզեպ Բորելը հայտարարել է ռուսական բանկերի ցանկի ընդլայնման մասին, որոնք անջատվելու են SWIFT միջբանկային վճարումների միջազգային համակարգից։ Այս մասին Բորելը լրագրողներին ասել է երկուշաբթի երեկոյան՝ Պանամա կատարած այցի ժամանակ, հայտնում է վենեսուելական VPI հեռուստաալիքը։
«Կլինեն ավելի շատ ռուսական բանկեր, որոնք կլքեն SWIFT վճարային համակարգը: Էներգետիկ ոլորտում էլ մենք փնտրում ենք միջոցներ, որոնք կազդեն ռուսական նավթի ներմուծման վրա»,-ասել է Բորելը:
Ինչպես ավելի վաղ հայտնել էր էներգետիկայի հարցերով եվրահանձնակատար Կադրի Սիմսոնը, Եվրահանձնաժողովը մայիսի 3-ին Եվրահանձնակատարների կոլեգիայի նիստում կքննարկի Ռուսաստանի դեմ ԵՄ պատժամիջոցների վեցերորդ փաթեթը։
Բրյուսելում գործող ընթացակարգի համաձայն՝ պատժամիջոցների նախագիծը նախ պետք է հաստատվի Եվրահանձնաժողովի կողմից, այնուհետ դրանք քննարկման կներկայացվեն ԵՄ 27 երկրների դեսպաններին, իսկ դեսպանների կողմից պատժամիջոցների հաստատումից հետո ԵՄ խորհուրդի արտաքին գործերի նախարարների մակարդակը պետք է հաստատի:
Նախկինում պատժամիջոցների մասին պաշտոնապես հայտարարվում էին միայն վերջնական հաստատումից հետո։ Այնուամենայնիվ, այս տարվա մարտից Ուրսուլա ֆոն դեր Լեյենը սկսեց հրապարակայնորեն հայտարարել չհաստատված պատժամիջոցների առաջարկների մասին՝ Եվրոպական հանձնաժողովի կողմից դրա հաստատումից անմիջապես հետո:
Ըստ եվրոպական լրատվամիջոցների՝ պատժամիջոցների վեցերորդ փաթեթի շրջանակներում կլինի ԵՄ-ի սև ցուցակի հետագա ընդլայնում, SWIFT-ից մի քանի ռուսական բանկերի անջատում և Ռուսաստանից նավթի մատակարարումների հնարավոր մասնակի էմբարգո։
Եվրահանձնաժողովի տվյալներով՝ ԵՄ-ն Ռուսաստանից ստանում է գազի 40%-ը, նավթի 27%-ը և ածուխի 46%-ը։ Ածխի մատակարարումների էմբարգոն ապրիլին ընդունված պատժամիջոցների հինգերորդ փուլի մի մասն էր, այն նույնպես ընդունվեց հետաձգված հիմունքներով և ուժի մեջ կմտնի օգոստոսից։
