Մենք այս օրերին ականատես ենք լինում մի իրավիճակի, երբ կոնկրետ խմբերի կողմից փորձ է արվում օգտագործել ժողովրդավարության ընձեռած ազատությունները՝ որպես սանձարձակություններ և անկարգություններ իրականացնելու միջոց և միջոց՝ կրկին վերազավթելու ՀՀ-ում ժողովրդի իշխանությունը: Այս մասին այսօր Ազգային ժողովում իր ելույթում ասաց «Քաղաքացիական պայմանագիր» խմբակցության պատգամավոր Արթուր Հովհաննիսյանը:
«Ընդդիմությունը փչում է, ընդդիմությունը կրկին փչում է կեղծ իրականության պղպջակը, որի մեջ բարձր ձայնով և դեմքի վստահությամբ իրենք իրենց խաբել են, թե կարող են ժողովրդին տասնամյակներ կեղեքելուց հետո ստանալ այդ նույն ժողովրդի աջակցությունը»,- ասաց նա:
Նա նկատեց, որ այսպիսի մի պղպջակ արդեն պայթեց վերջին խորհրդարանական ընտրություններին, երբ ժողովուրդը օգտագործեց իր վերջին փամփուշտը և կատարեց իր ընտրությունը:
«Ընդդիմադիրների գործողությունները միտված են գողացածին և իրենց փրկության մասին են: Սերժ Սարգսյանի և Ռոբերտ Քոչարյանի պայքարը չի կարող ստանալ ժողովրդի աջակցությունը, քանի որ իրենց կառավարման տարիներին՝ գործով, իսկ հիմա՝ խոսքով ցույց են տվել, թե որքան շատ չեն սիրում մեր ժողովրդին, բայց նրանք չեն հասկացել, որ մեր ժողովուրդը նրանց չի սիրում ավելի շատ»,- ասաց նա:
