Հայաստանի Հանրապետության Հեռուստատեսության եւ ռադիոյի հանձնաժողովն այսօր հանդես է եկել հայտարարությամբ՝ կոչ անելով «խոսքի ազատությունը չվերածել ատելության քարոզի»:
Ներկայացնում ենք հայտարարությունն ամբողջությամբ.
«Հանրապետությունում ստեղծված քաղաքական իրավիճակը բոլորիցս՝ Հանձնաժողովի կարգավորման ներքո գտնվող լիցենզավորված եւ հեղինակազորված Հեռարձակողներից, ո՛չ միայն լարվածության սահուն, առանց սրացումների հաղթահարելու դիրքորոշում է պահանջում, այլեւ բարձր աստիճանի զսպվածություն եւ ինքնահսկողություն։
Լարված ներքաղաքական իրավիճակներում հենց մեծ ազդեցություն ունեցող հեռուստա եւ ռադիոընկերությունները պետք է դառնան այն հարթակները, որոնք ո՛չ միայն կարող են մեղմել քաղաքական կրքերը, այլեւ ապահովել դրանց դրսեւորման նորմալ, բանական եւ քաղաքակիրթ ձեւերը։ Մասնագիտական ձեր պարտականությունն է՝ չբորբոքել դրանք եւ, ինչպես ասում են, յուղ չլցնել կրակին, այլ բոլոր հակասություններն ու վեճերը ուղղորդել դեպի քաղաքակիրթ ու բանական քննարկումներ, վերլուծություններ եւ բանավեճեր։
Հեռուստատեսության եւ ռադիոյի հանձնաժողովը մշտապես հանդես է եկել խոսքի ազատության եւ կարծիքների ազատ արտահայտման սկզբունքի պաշտպանության դիրքերից։ Սակայն, դա չի նշանակում , որ այդ ազատությունները պետք է վերածել ապատեղեկատվության գործիքի, ատելության խոսքի, անձնական թշնամանքի կամ միմյանց սեւացնելով ու վարկաբեկելով՝ իրար հետ հաշիվներ մաքրելու միջոցի։ Հայաստանի, Արցախի եւ Սփյուռքի տասնյակ հազարավոր մեր հայրենակիցներ քաղաքական այս թոհուբոհում կարող են կողմնորոշվել հենց ձեր խոսքով, պահվածքով, բարեխղճությամբ։
Հանձնաժողովը եւս մեկ անգամ կոչ է անում Հեռարձակողներին ապահովել հրապարակված տեղեկության ճշգրտությունը, անկողմնակալությունն ու բազմակարծությունը, ցուցաբերել ազնվություն՝ տեղեկությունները հավաքելու մեթոդներում, բացառել սոցիալական կարգավիճակի, անձի կամ խմբի որեւէ այլ հատկանիշի հիմքով խտրականությունը։
Հանձնաժողովը նաեւ հիշեցնում է, որ լիցենզիա ստացած Հեռարձակողները պետք է հետեւեն լիցենզիոն հայտով ստանձնած պարտավորություններին, որոնց խախտումները կարող են հանգեցնել օրենքով սահմանված պատժամիջոցների կիրառմանը»։
