Reuters լրատվական գործակալությունը լայնածավալ հետազոտություն է անցկացրել և հայտարարել է, որ Կիևի շրջանում գտնվող Բուչա ավանում մարդկանց սպանդի հետ առնչություն ունեն գրավման պահին այնտեղ գտնվող ռուսական ուժերը:
Ըստ հետազոտության, Կիևի շրջանի այդ հատվածում տեղակայված են եղել «Ռոսգվարդիա» կառույցի «Վիտյազ» ստորաբաժանումը, Պսկովից ժամանած 76-րդ դեսանտային դիվիզիան և չեչենական զորամիավորումները:
Reuters-ի հետաքննող լրագրողների փոխանցմամբ, Բուչայում Յաբլունսկի փողոցում, որտեղ ռուսները շտաբ էին տեղակայել և որտեղ հետագայում հայտնաբերվել են 8 խաղաղ բնակիչների դիակներ, ուկրաինացի զինծառայողները գտել են «Վիտյազ» ստորաբաժանման զինծառայող Կոնստանտին Կորշունովի վկայականը:
Տեղացի բնակիչները նաև հայտնաբերել են Պսկովից դեսանտային Ալեքսանդր Լոգվինենկոյին հասցեագրված մի նամակ:
Հարևան տանը, որը նույնպես այդ օրերին գրավել էին ռուս զինվորականները, պատի վրա գրված էր Wolf_68: Հետաքննող լրագրողները պարզել են, որ այդ անվամբ է ռուսական սոցցանցերում գրանցված 76-րդ դեսանտային դիվիզիայի 234-րդ ավիագնդի զինծառայող Կիրիլ Կրյուչկովը:
Չեչենների գործողությունների մասին են պատմել տեղացի բնակիչները, կան նաև այդ մասին վկայող լուսանկարներ և տեսագրություններ, որոնց մի մասը տեղադրվել է սոցցանցերում:
Reuters-ը հաստատել է, որ Բուչայում և դրա արվարձաններում խաղաղ բնակիչների սպանության օրերին տեղակայված են եղել Չեչնիայի ղեկավար Ռամզան Կադիրովին ենթարկվող առնվազն երեք չեչենական զորամիավորումներ:
Ռուսական ուժերը Բուչայից հեռացել են ապրիլի 5-ին: Դրանից հետո քաղաքում հայտնաբերվել են գնդակահարված մարդկանց դիակներ: Զոհերից շատերի ձեռքերը կապված են եղել:
Ուկրաինան և արևմտյան երկրները Բուչայում ռուսական բանակի գործողություններն անվանել են «պատերազմի հանցագործություն» և «ցեղասպանություն»:
Ռուսաստանի պաշտպանության նախարարությունը հերքել է մեղադրանքը և պնդել է, թե ուկրաինական կողմը սադրիչ նպատակով կեղծ տեղեկություններ ու բեմականացված լուսանկարներ և տեսագրութություններ է ներկայացրել:
Ապրիլի 28-ին Ուկրաինայի դատախազությունը հրապարակել է Բուչայում պատերազմական հանցագործությունների և դիակապտության մեջ մեղադրվող 10-ը ռուսաստանցի զինծառայողների անունները:
Աղբյուրը՝ Azatutyun.am:
