Միջազգային հանրապետական ինստիտուտը (ՄՀԻ) շարունակելու է իր աջակցությունը Հայաստանի ժողովրդավարական ինստիտուտների կարողությունների զարգացմանը, հայտարարել է ինստիտուտի Եվրասիայի տարածաշրջանային տնօրեն Ստիվեն Նիքսը Հայաստանի արտաքին քաղաքական գերատեսչության ղեկավար Արարատ Միրզոյանի հետ հանդիպման ժամանակ։ Այս մասին հայտնում են ԱԳՆ-ից։
Ընդգծելով, որ Հայաստանի կառավարության առաջնահերություններից է ժողովրդավարության, օրենքի գերակայության ամրապնդումը, կոռուպցիայի դեմ շարունակական պայքարը՝ Միրզոյանը նշել է, որ Հայաստանը հետևողական քայլեր է ձեռնարկում պետական մարմինների գործունեության թափանցիկության և հաշվետվողականության բարձրացման, մարդու իրավունքների վրա հիմնված ներառական զարգացման համար։
Միրզոյանը պաշտոնական այցով Վաշինգտոնում է մայիսի 2-ից։ Նա հանդիպել է ԱՄՆ պետքարտուղար Էնթոնի Բլինքենի, USAID տնօրեն Սամանթա Փաուերի, ԱՄՆ պետքարտուղարի քաղաքական հարցերով տեղակալ Վիկտորիա Նուլանդին։ Երեկ Atlantic Council-ում նա ներկայացրել է հայ – թուրքական և հայ – ադրբեջանական գործընթացները։
