Կանադայի վարչապետ Ջասթին Թրյուդոն այցելել է Ուկրաինա, հայտնել է Իրպին քաղաքի քաղաքապետ Ալեքսանդր Մարկուշինը։ Քաղաքապետի խոսքով՝ մոտ ապագայում Իրպենի իշխանությունները կդիմեն Կանադային՝ քաղաքի ենթակառուցվածքները վերականգնելու հարցում օգնության խնդրանքով։
«Նա եկել էր Իրպեն, որ իր աչքերով տեսնի այն ամբողջ մղձավանջը, որ ռուս զավթիչները արեցին մեր քաղաքին։ Եվ իհարկե նա ցնցված էր։ Չէ՞ որ նա տեսել է այրված և հիմնովին ավերված ոչ թե ռազմական օբյեկտներ, այլ իրպենցիների տները, ովքեր մինչև վերջերս վայելում էին կյանքը և կազմում իրենց ապագայի պլանները»,- գրել է պարոն Մարկուշինը Telegram-ի իր ալիքում։
Սա Ջասթին Թրյուդոյի առաջին այցն է Ուկրաինա ռուսական ռազմական գործողության սկզբից ի վեր։ Այսօր ավելի վաղ՝ մայիսի 8-ին, ԱՄՆ առաջին տիկին Ջիլ Բայդենն այցելել էր Ուկրաինա։ Նա Ուժգորոդում հանդիպել է Ուկրաինայի նախագահի կնոջ՝ Օլենա Զելենսկայայի հետ։
Աղբյուրը՝ kommersant.ru:
Թարգմանեց՝ Աստղ Խաչատրյանը։
