«Մայիսիննյան տոները մեր ժողովրդի փայլուն հաղթանակների խորհրդանիշն ու վկայությունն են։ Հայ ժողովրդի համար ճակատագրական այս շրջափուլում հայրենական մեծ պատերազմում տարած հաղթանակի 77, Շուշիի ազատագրման և պաշտպանության բանակի կազմավորման 30-ամյակի օրը չպիտի վերափոխել պարտվողականության ու նահանջի տրամադրությունների։
Հանգամանքների բերումով մայիսյան հաղթատոները չենք նշում Շուշիում’ տոնական տրամադրությամբ, ռազմական շքերթով։ Հաղթանակների մասին, սակայն, անցյալով չեն խոսում. անցյալի հաղթանակների պտուղները տեսականորեն գուցե կորսված են թվում, բայց գործնականում դրանք կարող են և պե’տք է դառնան մեր ապագա հաղթանակների նախապատճառն ու նախադրյալը։
Հիշե’նք, գնահատե’նք, մեծարե’նք նրանց, ովքեր պայքարել են հաղթելու վստահությամբ և չպարտվելու հաստատակամությամբ: Փա՜ռք և խոնարհում նրանց, ովքեր հաղթանակ են կռել համառ կամքի ու ջանքի, առողջության ու կյանքի գնով։Համոզմունքս է’ մի ժողովուրդ, որ չի ուզում պարտվել, նրան չեն կարող պարտության մատնել։ Ուստի’ ապագայի նկատմամբ անսասան հավատքով և ամուր կամքով դեպի նոր, փառահեղ հաղթանակներ…Ի գո’րծ»,- գրել է Արցախի պաշտպանության առաջին նախարար, Հայաստանի «Ազատական» և Արցախի «Միասնականան հայրենիք» կուսակցությունների հիմնադիր-նախագահ՝ Սամվել Բաբայանը։
