Զելենսկին հավաստիացրել է՝ Ուկրաինան կհաղթի Ռուսաստանին և ոչ մի տարածք չի զիջի

Ուկրաինայի նախագահ Վլադիմիր Զելենսկին այսօր ելույթ է ունեցել նացիստական Գերմանիայի նկատմամբ հաղթանակի օրվա առթիվ: Նա հավաստիացրել է, որ Ուկրաինան կհաղթի իր վրա հարձակված Ռուսաստանին և ոչ մի տարածք չի զիջի:

«Հաղթանակի օրը մենք կռվում ենք հանուն նոր հաղթանակի: Ճանապարհը ծանր է, բայց մենք կասկած չունենք, որ կհաղթենք: Ո՞րն է մեր առավելությունը թշնամու նկատմամբ: Մեր պատմության դասագիրքն է, մենք ոչ մի վիշտ չէինք ապրի, եթե մեր թշնամիները ժամանակին կարդային մեր պատմությունը»,- ասել է Զելենսկին:

Նրա փոխանցմամբ, փետրվարի 24-ին հարձակվելով Ուկրաինայի վրա՝ Ռուսաստանը կոպիտ սխալ է գործել, նման սխալ են կատարել բոլոր թշնամիները:

«Մեր հողը փամփուշտներով և արկերով է ցանված, բայց ոչ մի թշնամի այստեղ արմատ չի գցել»,- ասել է Զելենսկին:

Նա հայտարարել է, որ ուկրաինացիները կշարունակեն պայքարն իրենց երեխաների ազատության համար:

Աղբյուրը՝ Azatutyun.am: