«Շարունակենք.
Ենթադրենք, որ ես ընդդիմություն եմ, ի՞նչ կանեի, որպեսզի հաջողեմ, այսինքն իշխանություն դառնամ, քանզի դա է միջոցը, որ իշխանական լծակներով իրագործեմ իմ ծրագրերը: Նախ, հաշվի առնելով պատերազմի արդյունքները և հետպատերազմական տարբեր իրադարձությունները, պետության անկայուն վիճակը, շատ լուրջ կուսումնասիրեի իրավիճակը՝ ներքին քաղաքական, արտաքին քաղաքական, այդ թվում՝ գլոբալ աշխարհագրության փոփոխության դինամիկայի ներքո, սոցիալ-տնտեսական, բարոյահոգեբանական, մարդկանց բոլոր հուզող տարրական առաջնային հարցերը:
Այս ամենը մենակ չէի անի, քանի որ հնարավոր չէ, բայց հիշում ենք չէ՞, որ ես, ենթադրաբար, տարիներ շարունակ պետության բարձրագույն ղեկավարության պաշտոնյաներից մեկի որդին եմ, տիրապետում եմ հսկայական ֆինանսական ռեսուրսների և թունդ հայրենասեր եմ՝ առ Արցախ և առ Հայաստան, ուստի կվարձատրեի բարձր որակավորում ունեցող ոլորտային մասնագետների, որոնք այս բոլոր խնդիրները կարձանագրեին:
Այդ նույն մասնագետների հետ բոլոր արձանագրված խնդիրները ոլորտ առ ոլորտ կմշակեինք, կկազմեինք ծրագրեր՝ մանրամասն քայլերով և ժամանակացույցով: Հաշվի առնելով, որ իմ տրամադրության տակ ունեմ բավական թվաքանակով պատգամավորական խմբակցություն (ի դեպ դա էլ այն դեպքում, որ ոնց ոտքս խփեմ գետնին՝ տենց կշարվեն) և պետական վերահսկողության բավարար ազդեցության լծակներ, լիարժեք կներգրավվեի աշխատանքի մեջ։
Որտեղ տեղին է՝ օրենսդրական դաշտի շուրջ կհամագործակցեի, որտեղ տեղին չէ՝ հիմնավոր փաստարկներով խիստ քննադատության կենթարկեի, առավելևս, որ քիչ չեն բացերը ու թերացումները, ոչ թե մարդկանց զգացմունքների և պաթոսի վրա խաղալով: Եվ այդպես համբերատար, հանդարտ կաշխատեի՝ ի նպաստ պետության և ժողովրդի, ինչպես նաև իմ ամբիցիաներն իրագործելու համար բարձրացնելով իմ քաղաքական կշիռը:
Եվ որոշակի ժամանակ անց ունենալով հանրային լայն աջակցություն, իսկ դա, վստահաբար, այդպես կլիներ, եթե կառավարող ուժը չընդուներ իմ հիմնավոր փաստարկները, կհնչեցնեի իշխանափոխության համար անհրաժեշտ քաղաքական օրակարգ:
հ.գ. Շեշտում եմ, եթե, իհարկե, իմ նպատակները լինեին ազնիվ, այլ ոչ թե մարդկանց հույզերը օգտագործելով՝ սադրել, հրահրել, փորձել հունից հանել, որպեսզի տեղի ունենա բախում: Սակայն, ինչպես հասկացաք, քանի որ ես չեմ, չեմ անում:
Շարունակելի…Շնորհակալություն ուշադրության համար
հարգանքով՝ նավակ Ճոճողը»,- գրել է «Քաղաքացիական պայմանագիր» խմբակցության պատգամավոր Վիլեն Գաբրիելյանը։
