Պաշտոնական Բուդապեշտը կրկին հայտարարում է, որ Ռուսաստանում արդյունահանված նավթի ներկրումների լիակատար արգելքի սահմանումը «Հունգարիայի տնտեսության համար ատոմային ռումբի էֆեկտ կունենա»։ Այս մասին Հունգարիայի ԱԳ նախարար Պետեր Սիյարտոն հայտարարել է «Ֆեյսբուքի» իր էջում հրապարակված տեսաուղերձում՝ նշելով, որ երկրի ղեկավարությունը Բրյուսելից հստակ զիջումներ է ակնկալում։
«Մենք հստակորեն ասել ենք Եվրահանձնաժողովի ներկայացուցիչներին, որ ռուսական նավթի վրա սահմանվող պատժամիջոցները կաջակցենք միայն մի դեպքում՝ եթե Բրյուսելը առաջարկի նաև այն խնդիրների լուծման ուղիները, որոնք ի հայտ են գալու էմբարգոյի հաստատման դեպքում», – հայտարարել է Հունգարիայի արտգործնախարարը։
Պետեր Սիյարտոյի խոսքով՝ Եվրահանձնաժողովն առայժմ նման լուծումներ չի առաջարկել։
«Դա նշանակում է, որ պատժամիջոցների նոր փաթեթի շուրջ համաձայնություն ձեռք բերելու միակ տարբերակը էմբարգո սահմանելն է բացառապես ծովով մատակարարվող ռուսական նավթի վրա։ Մեր համոզմամբ, խողովակաշարերով իրականացվող մատակարարումները պետք է ամբողջությամբ դուրս բերվեն սանկցիաների ցանկից», – նշել է Սիյարտոն։
Աղբյուրը՝ Azatutyun.am:
