Մաքսայինի աշխատողները գումար են վերցնում Մեղրիի սահմանին քաղաքացիների ու բեռների փոխադրումն իրականացնելու համար. Հետք

Հայ-իրանական սահմանին` Մեղրիի մաքսային ծառայության էլեկտրամոբիլի աշխատակիցները յուրաքանչյուր տեղափոխման համար 1000 դրամ են վերցնում քաղաքացիներից: Էլեկտրամոբիլի վրա փակցված է ՀՀ մաքսային ծառայություն գրությունը, իսկ դրա վարորդը մաքսային ծառայողի արտահագուստ է կրում:

Քանի դեռ սահմանագծին սպասում էինք էլեկտրոմոբիլին, իրանական սահմանից առևտուր անող հայ երիտասարդները, որոնք պարբերական գալիս են Իրան, գնումներ կատարում և վերադառնում Հայաստան, պատմում էին, որ ամեն անգամ էլեկտրամոբիլի վարորդին 1000 դրամ են վճարում իրենց և իրերը չեզոք գոտուց սահման հասցնելու համար: Այդ տարածությունը մոտ 1 կմ է: Որպեսզի մեծ ծանրոցներով այդքան ճանապարհը չքայլեն, քաղաքացիները էլեկտրամոբիլով են տեղաշարժվում, որի դիմաց վճարում են 1000 դրամ:

Մեր հարցադրմանը, թե արդյոք վարորդը կտրոն է տրամադրում 1000 դրամի դիմաց, պատմեցին, որ ոչ մի կտրոն չի տրամադրվում:
Մենք նույնպես այդ երիտասարդների հետ օգտվեցինք էլեկտրամոբիլից, որի դիմաց երիտասարդը մեր ներկայությամբ վճարեց 1000 դրամը: Վարորդից հետաքրքրվեցինք, թե ինչու է մաքսային ծառայության էլեկտրամոբիլը և վարորդը քաղաքացիներից գումար վերցնում, և արդյոք այդ ծառայությունը վճարովի է, վարորդը պատասխանեց. «Տալիս են, վերցնում եմ»: ՄԵր հարցադրմանը, թե ինչու դրա դիմաց քաղաքացիներին կտրոն չի տրամադրվում, մաքսային ծառայողի արտահագուստով երիտասարդը զարմանքով արձագանքեց. «Ի՞նչ կտրոն»:
Ավելին՝ hetq.am