Ռուսաստանը սպառնալիք է համարում Ֆինլանդիայի միացումը ՆԱՏՕ-ին․ Պեսկով

Ռուսաստանի նախագահ Վլամիդիր Պուտինի խոսնակ Դմիտրի Պեսկովն այսօր ասել է, թե ՆԱՏՕ-ի հետագա ընդարձակումը չի նպաստի Եվրասիայի անվտանգության ամրապնդմանն, իսկ Ֆինլանդիայի միացումը կդիտվի Ռուսաստանի համար սպառնալիք:

Նա նշել է, որ Մոսկվան անպայման կարձագանքի Ֆինլանդիայի հնարավոր անդամակցությանը Հյուսիսատլանտյան դաշինքին և համապատասխան քայլերով կամրապնդի սեփական անվտանգությունը:

«Իհարկե, դա կդառնա հատուկ վերլուծության և անհրաժեշտ որոշումներ ընտրելու համար քննարկման թեմա»,- ասել է Պեսկովը:

Նրա խոսքով, Ռուսաստանի գործողությունները կախված կլինեն այն հանգամանքից, թե որքանով է ՆԱՏՕ-ի ռազմական ենթակառուցվածքը մոտենալու երկրի սահմաններին:

Ինչպես ավելի վաղ հայտնել էինք, Ֆինլանդիայի նախագահն ու վարչապետը հայտարարել են, որ երկիրը պետք է անհապաղ ՆԱՏՕ-ին անդամակցելու հայտ ներկայացնի։