Վարչապետի մասին կեղծ լուրերի տարափը վերջին շրջանում ահագնացել է նաև միջազգային մակարդակում և այդ լուրը ևս կեղծ է։ Այս մասին այսօր կառավարության նիստից հետո լրագրողների հետ զրույցում ասաց Անվտանգության խորհրդի քարտուղար Արմեն Գրիգորյանը՝ անդրադառնալով մամուլում շրջանառվող լուրերին՝ կապված ՀՀ վարչապետ Նիկոլ Փաշինյանի մոսկովյան այցի հետ։
«Վարչապետ Նիկոլ Փաշինյանը Հայաստանի ներքաղաքական հարցերում միշտ ապավինել է հայ ժողովրդի կամքին»,– ասաց նա։
Մասնավորապես՝ բողոքի ակցիաների վերաբերյալ Արմեն Գրիգորյանն ասաց, որ մեկ ամիս է, արդեն, ցույցերի կազմակերպիչներն իրացնում են բողոքի ցույցեր իրականացնելու իրենց իրավունքը։
«Ակնհայտ է, որ ընդդիմության կազմակերպած բողոքի ակցիաները չեն ստացել հանրության աջակցությունը, բնականաբար բողոքի ակցաիների հանգուցալուծումը բացառապես տեսնում ենք Հայաստանի ներքաղաքական ինստիտուցիոնալ միջոցներով»,– ասաց նա։
