Կառավարության նիստից հետո Անվտանգության խորհրդի քարտուղար Արմեն Գրիգորյանը լրագրողների հետ զրույցում անդրադարձավ հարցին՝ ի վերջո, Հայաստանում կա՞ն ադրբեջանական անկլավներ, թե՞ ոչ:
Գրիգորյանը հայտնեց, որ անկլավների մասով Ադրբեջանը դեռևս չի ներկայացրել իրավական հիմքեր:
Մինչդեռ, նրա խոսքով, հայկական կողմն ունի իրավական հիմնավորում՝ Ադրբեջանի տարածքում գործող անկլավների մասին:
«Հայաստանի դիրքորոշումը շարունակում է մնալ՝ ակնկալում ենք, որ Ադրբեջանն իրավական հիմքեր ներկայացնի իր ասած անկլավների հարցում»,- նշեց նա:
Խոսելով դելիմիտացիայի և դեմարկացիայի հանձնաժողովների աշխատանքային հանդիպման մասին՝ Գրիգորյանն ասաց, որ տեխնիկական համաձայնություն չլինելու պատճառով հանդիպումը կազմակերպել դեռևս չի հաջողվել:
