ՌԴ ելույթի ժամանակ հինգ երկրի ներկայացուցիչ լքել են APEC նախարարների հանդիպումը

Ճապոնիայի, ԱՄՆ-ի և երեք այլ երկրների ներկայացուցիչներ լքել են Ասիա-խաղաղօվկիանոսյան տնտեսական համագործակցության (APEC) առևտրի նախարարների հանդիպումը՝ Ռուսաստանի Դաշնության տնտեսական զարգացման նախարար Մաքսիմ Ռեշետնիկովի ելույթի ժամանակ։ 

Այս մասին գրում է «ՏԱՍՍ»-ը:

Շաբաթ օրը Բանգկոկում բացվել է APEC երկօրյա նախարարական հանդիպումը։ Ռեշետնիկովը դրան մասնակցել է տեսահոլովակի միջոցով։

Հանդիպումը լքելու որոշումը ընդունվել է ի նշան բողոքի՝ ընդդեմ Ուկրաինայում Ռուսաստանի Դաշնության հատուկ ռազմական գործողության։

APEC-ը բաղկացած է 19 երկրներից և երկու տարածքներից։ Նրանց թվում են 12 հիմնադիրները՝ Ավստրալիան, Բրունեյն, Ինդոնեզիան, Կանադան, Մալայզիան, Նոր Զելանդիան, Սինգապուրը, ԱՄՆ-ը, Թաիլանդը, Ֆիլիպինները, Հարավային Կորեան և Ճապոնիան։ Մասնակցում են նաև ՉԺՀ-ն (անդամակցել է 1991 թվականին), Մեքսիկան և Պապուա Նոր Գվինեան (1993), Չիլին (1994), Ռուսաստանը, Վիետնամը և Պերուն (1998): 1991 թվականին չինական երկու տարածքներ՝ Հոնկոնգը և Թայվանը ևս միացան APEC-ին։ Կազմակերպության նախագահությունը Նոր Զելանդիայից ստանձնել է Թաիլանդը։ APEC անդամ երկրների ղեկավարների հանդիպումը նախատեսված է նոյեմբերի 18-19-ը Բանգկոկում։