Մայրաքաղաքի 18 մանկապարտեզներ հիմնովին կվերանորոգվեն

Երևանի քաղաքապետարանի գործակարգավարական նիստի ընթացքում նշվեց, որ մանկապարտեզների վերանորոգման ծրագրեր կիրականացվեն։
Քաղաքապետին զեկուցվեց, որ  էներգաարդյունավետության ծրագրի շրջանակում  13 մանկապարտեզներում աշխատանքները շարունակվում են, դրանցից մեկում աշխատանքները 2-3 շաբաթից կավարտվեն, մանկապարտեզը կհանձնվի շահագործման։

«Էներգաարդյունավետության երկրորդ ծրագրի տեխնիկատնտեսական ուսումնասիրության շրջանակում այցելություններ են իրականացվել  18 մանկապարտեզներ, որտեղ պետք է իրականացվի շենքերի լրիվ նոր  նախագծերի մշակում՝ քանդել-կառուցել տարբերակով։ Ուսումնասիրվել է նաև, թե  որ մանկապարտեզներ են, որոնք ունեն կապիտալ վերանորոգման, սեյսմիկ ամրացման և էներգաարդյունավետության միջոցառումների կարիք ։ Արդեն դրա հիման վրա դիմել ենք ՄԱԿ-ի զարգացման  գրասենյակի մեր գործընկերներին»,- նշեց Քաղաքային կայուն զարգացման ներդրումային ծրագրի ղեկավար Աննա Մարտիրոսյանը։ 

Մարտիրոսյանը զեկուցեց նաև, որ կոշտ կենցաղային թափոնների կառավարման մասով հանդիպումներ են եղել Վերակառուցման զարգացման եվրոպական բանկի  գործընկերների հետ և միջոցաումների ընթացքը կապահովվի ըստ  ձեռք բերվելիք պայմանավորվածությունների։  

«Քաղաքային կայուն զարգացման ներդրումային ծրագրի շրջանակում  ավարտին են մոտեցել Արգավանդ-Շիրակ ճանապարհահատվածի շինարարական աշխատանքները, հունիսի 4-ին նախատեսված է բացման արարողությունը։  Բաբաջանյան-Աշտարակ ճանապարհահատվածում աշխատանքները շարունակվում են»,- նշեց Աննա Մարտիրոսյանը։