ԱՄՆ Հայ դատի հանձնախումբը հանդես է եկել համաժողովրդական գործողության կոչով ՝ Կոնգրեսի անդամներին խրախուսելու ստորագրել Շերման-Կոքսի նամակը ՝ ի աջակցություն Արցախին ցուցաբերվող օգնության շարունակականության։
«Թրամփի վարչակազմը, տեղի տալով Ադրբեջանի ալիևյան ավտորիտար ռեժիմին, թիրախավորում է Արցախում մարդասիրական օգնության ծրագիրը ՝ փորձելով փակել The HALO Trust-ի ականազերծման ծրագիրը, որը բազմաթիվ կյանքեր է փրկել ողջ հանրապետությունում»,- նշված է Ամերիկայի Հայ դատի հանձնախմբի հայտարարությունում:
ԱՄՆ ներկայացուցիչների պալատի դեմոկրատ ներկայացուցիչներ Բրեդ Շերմանը և Թիջեյ Կոքսը, Հայ դատի հանձնախմբի սատարմամբ, ղեկավարում են Կոնգրեսի արշավը, որը կոչ է անում ԱՄՆ Միջազգային զարգացման գործակալության (USAID) ղեկավար Մարկ Գրինին ՝ շրջադարձ կատարել և պահպանել Լեռնային Ղարաբաղի ականազերծման ծրագիրը: Գրինն այս տարվա ապրիլի 9-ին Սենատի Արտաքին հարաբերությունների հանձնաժողովի առջև ելույթում նշել էր, որ USAID-ը հավատարիմ է ականազերծմանն ու չպայթած զինամթերքի վնասազերծմանը «Լեռնային Ղարաբաղի ավանդական սահմաններում»:
Թարգմանությունը՝ Զառա Պողոսյանի
Լուսանկարում՝ The HALO Trust-ի ականազերծողն աշխատում է Արցախում (Al Jazeera)
Ավելին՝ civilnet.am
