Վարչապետ Իրակլի Կոբախիձեն հայտարարել է վեց տարուց ավելի առաջ արտադրված մեքենաների ներմուծման արգելքի մասին: Համապատասխան օրինագիծն արդեն ներկայացվել է խորհրդարանի քննարկմանը:
«Վերջին տարիներին Վրաստանում տրանսպորտային միջոցների թիվը զգալիորեն և կտրուկ աճել է։ 2012 թվականին Վրաստանում գրանցվել է 864 հզ․ տրանսպորտային միջոց, և այս տարվա տվյալներով՝ այս թիվը գերազանցել է երկու միլիոնը։ Մենք տեսնում ենք աճի մասշտաբները։ Տրանսպորտային միջոցների թվի նման աճը, մի կողմից, հանգեցնում է երթևեկության խցանումների, մյուս կողմից՝ էկոլոգիական վիճակի վատթարացման։ Համապատասխանաբար, կարծում ենք, որ այստեղ նույնպես պետք է ձեռնարկվեն կարևոր միջոցառումներ։ Այդ նպատակով խորհրդարանին ներկայացրել ենք օրենքի նախագիծ, որը նախատեսում է 6 տարեկանից հին տրանսպորտային միջոցների ներմուծման արգելք։ Իհարկե, կտրամադրվեն փոքր բացառություններ»,- ասել է Իրակլի Կոբախիձեն։
