6 ամիս հանձնաժողովն աշխատեց և 6 ամսվա ընթացքում մեկ դրամի, մեկ լումայի թալանի դեպք չի արձանագրել: ՀՀ Ազգային ժողովում իր ելույթում ասաց «Քաղաքացիական պայմանագիր» խմբակցության պատգամավոր Գևորգ Պապոյանը՝ անդրադառնալով «Հայաստան» համահայկական հիմնադրամից պետբյուջե փոխանցված միջոցների օգտագործումը ուսումնասիրող քննիչ հանձնաժողովի աշխատանքներին։
«Չկա որևէ դեպք, եթե լիներ, հանձնաժողովի ընդդիմադիր անդամները կասեին, որ 6 ամսվա ընթացքում բացահայտել են այսքան դրամի թալանի դեպք»,- ասաց նա։
Գևորգ Պապոյանը նշեց, որ պատրաստ են այդ հարցում մինչև վերջ գնալ: «Բայց ընդդիմությունը չի գալիս ԱԺ, չի գալիս աշխատանքի և չի փորձում այնպես անել, որ իրենց մատնանշած թալանը բացահայտվի։ 6 ամիսը բավարար ժամանակ էր, որպեսզի հանձնաժողովը կարողանար գոնե մեկ դրամի թալանի բացահայտում անել:
Նրանք որևէ նոր բացահայտում չեն արել: Ամեն ինչ եղել է օրենքին համապատասխան, բայց նրանք շարունակում են չգալ աշխատանքի: Եվ այդ կարևոր հարցը թողել են օդի մեջ կախ»,- ասաց նա և նշեց, որ փոխարենը ընդդիմությունը զբաղված է մանր–մունր խուլիգանությամբ։
Նա նշեց, որ ընդդիմադիրները մի բան, որ կարողացել են անել, դա «Հայաստան» համահայկական հիմնադրամը անվանարկելն է եղել։