Հայաստանի նախագահ Վահագն Խաչատուրյանի հրամանագրով Հանրապետության տոնի առթիվ, հայրենիքի պաշտպանության և անվտանգության ապահովման գործում ներդրած ավանդի, մարտական գործողությունների ընթացքում ցուցաբերած խիզախության և նվիրումի համար Հայաստանի Հանրապետության պաշտպանության նախարարության մի խումբ զինծառայողներ և կամավորականներ պարգևատրել են մեդալներով։
ՀՀ նախագահի աշխատակազմից հայտնում են, որ Սարդարապատի հուշահամալիր, Հայոց ազգագրության թանգարանում տեղի ունեցած պարգևատրման արարողությանը Հանրապետության նախագահ Վահագն Խաչատուրյանը հանձնել է պարգևները, շնորհավորել պարգևատրվածներին, նրանց հարազատներին և շնորհակալություն հայտնել ցուցաբերած խիզախության և նվիրումի համար:
Հանրապետության նախագահ Վահագն Խաչատուրյանը նշել է.
«Այսօրը շատ խորհրդանշական է մեզ համար և մեր պատմության մեջ ամենակարևոր, ամենալուսավոր օրերից է:
Երկար դեգերումներից հետո մենք կարողացանք նորից ստանալ մեր պետությունը կառուցելու հնարավորություն և մենք մայիսի 28-ը նշում ենք որպես Հանրապետության օր: Դժվար ժամանակներ, օրեր ենք ապրել, բայց կարողացել ենք մեր պետականությունը պահպանել:
Մեր հաջողությունները պայմանավորված են եղել նրանով, որ մենք ապավինել ենք մեզ, վստահել ենք մեր ուժերին և կարողացել ենք հաղթել:
Երբ մի փոքր հեռվից ենք նայում նույնիսկ անհավանական է թվում: Դժվար էր հավատալ, որ կարելի էր 1918 թվականից հետո, ցեղասպանության այդ դաժան օրերից հետո պետություն կերտելու մասին մտածել: Սակայն հայ ժողովուրդը, մեր նախնիները դա արեցին: Այդպիսի հնարավորություն եղավ 1991 թվականին:
Ընդհանրապես Առաջին հանրապետության, Խորհրդային միության տարիների մասին տարբեր գնահատականներ են տալիս, սակայն կարծում ենք, որ մենք բոլորս միասին գնահատում ենք և՛ մեկը, և՛ մյուսը և այսօրվա մեր անկախ պետականությունը չէր լինի, եթե 1918 թվականը և Խորհրդային միության այդ 70 տարիները չլինեին:
Մենք 1991-ին էլ այդպես վարվեցինք և հիմա էլ ենք այդպես վարվում, այսինքն՝ ապավինում ենք մեր ուժին, մեր հնարավորություններին, վստահում ենք մեր իշխանությանը, մեր ժողովրդին և համոզված ենք, որ իսկապես կարողանալու ենք կերտել այն պետությունը, այն երկիրը, որի մասին երազում ենք:
Շնորհավորում եմ բոլորիս այսօրվա կապակցությամբ և մաղթում հաջողություններ, իսկ մեր պետականությանը՝ ուժ, կորով՝ դիմանալու այս դժվարին փորձություններին»։
