Թիվ 1 ստուդիան հյուրընկալել է «Հանուն հանրապետության» կուսակցության անդամ Արտաշես Խալաթյանին։
Պարոն Խալաթյանը նշեց, որ Ադրբեջանի կողմից հանձնաժողովի նախագահը փոխվարչապետ Շահին Մուստաֆաևն է, ով ծվել և իր կրթությունը ստացել է Հայաստանում, գերազանց տիրապետում է հայոց լեզվին և պատմությանը, այսինքն, սա հույս է ներշնչում, որ նման կադրի նշանակումը, անկախ նրանից, որ Ադրբեջանի նախագահը հրապարակային, տեսախցիկների առջև հաճախ իրարամերժ և ոչ կառուցողական հայտարարություններ է կատարում, պրակտիկ, գետնի վրա նման կադրի ղեկավարմամբ հանձնաժողովը միտված կլինի սահմանազատման և սահմանագծման գործողությունների արդյունավետ իրականացմանը։
Նա համոզմունք հայտնեց, որ որքան շատ են միմյանց հանդիպում դիվանագետները, որքան հաճախակի են նման բանակցային ձևաչափերի շրջանակներում հանդիպումներ տեղի ունենում, այնքան լարումը սահմանին ընկնում է։
Պարոն Խալաթյանը հավելեց, որ չպետք է ավելորդ շտապողականություն դրսևորել և չափազանցված ակնկալիքներ ունենալ, որ այդ հանձնաժողովների աշխատանքը անմիջապես կբերի իրավիճակի շուտ հանգուցալուծման։ Միջազգային փորձը ցույց է տալիս, որ կան պետություններ, որոնք տասը տարի սահմանագծման և սահմանազատման աշխատանքներ են իրականացնում և դեռևս չեն ավարտել։
Կարևոր է գործընթացի տարանջատումը․ մենք պետք է հասկանանք, որ ունենք մի կողմից՝ Արցախի կարգավիճակի հետ կապված բանակցություններ, մի կողմից՝ սահմանագծման և սահմանազատման աշխատանքներ, և մյուս կողմից՝ տարածաշրջանային կոմունիկացիաների ապաշրջափակում։
Մենք պետք է Ադրբեջանի հետ խաղաղության համաձայնագրի կնքումը չշախկապենք այս հարցերի հետ․ այդ խաղաղության համաձայնագիրը պետք է միտված լինի երկու խնդրի՝ դիվանագիտական հարաբերությունների հաստատաում, տարածաշրջանի կոմունիկացիաների բացում։
