Հայաստանի և Ադրբեջանի սահմանների սահմանազատման հարցով հանձնաժողովների մոսկովյան հանդիպման օրակարգում, բնականաբար, լինելու են սահմանազատմանը և սահմանագծմանը վերաբերող հարցեր, այսինքն՝ որպես առաջին հանդիպման շարունակություն, որպեսզի աշխատանքային խմբերը կարողանան քննարկել, թե ինչպես ենք առաջ գնալու այս գործընթացում:
Այսօր այս մասին Կառավարութան նիստից հետո լրագրողների հետ ճեպազրույցում ասաց ԱԽ քարտուղար Արմեն Գրիգորյանը։ Ինչ վերաբերում է հանդիպման օրվան և ժամին՝ Գրիգորյանն ասաց, որ աշխատանքային խմբի կողմից անպայման հայտարարություն կլինի:
Անդրադառնալով հայկական հանձնաժողովի փոքրաթիվ և ոչ թիրախային մասնագետներով հագեցած լինելու դիտարկումներին, ինչպես նաև ընդդիմադիր գործիչներին չներգրավելու հարցին՝ քարտուղարնը նկատեց՝ աշխատանքային խմբում ներգրավված աձանց թվաքանակը մեծ նշանակություն չունի։
«Որովհետև բոլոր հարցերը միջգերատեսչական քննարկումներ են անցնում, և բանակցությունների գնալուց առաջ աշխատանքային խումբը պատրաստություն է անցնում։ Ինչ վերաբերում է մասնագետներին, ընդդիմադիր գործիչներն ընդհանրապես ներկայացված չեն գործադիրում, և դա տրամաբանական է», – ասաց Արմեն Գրիգորյանը:
Անդրադառնալով Ադրբեջանի կողմից շարունակական սահմանային միջադեպերին, վերջինս նշեց՝ սահմանին ցանկացած լարում բացասաբար է ազդում բոլոր գործընթացների վրա:
«Դա է եղել պատճառը, որ սահմանազատման և սահմանագծման գործընթացները սկսելուց առաջ առաջարկում էինք, որ հայելային տարբերակով զորքերը հետ քաշվեն, որպեսզի սահմանին կայունություն լինի»,-ասաց Գրիգորյանը և ևս մեկ անգամ շեշտեց՝ սահմանային անվտանգությունը շարունակում է մնալ օրակարգում։
