Մայիսի 22-ի հանդիպումից հետո մենք շարունակական աշխատանքներ ենք տանում Բրյուսելի հետ, և բոլոր այն հայտարարությունները, որոնք հնչում են և չեն համապատասխանում Բրյուսելում քննարկված օրակարգին, մեր գործընկերների հետ քննարկումներ ենք ունենում:
Կառավարութան նիստից հետո լրագրողների հետ ճեպազրույցում ասաց ԱԽ քարտուղար Արմեն Գրիգորյանը՝ անդրադառնալով Եվրոպական խորհրդի նախագահ Շառլ Միշելի խոսնակի լրացուցիչ հայտարարությանը։
«Հայկական կողմը, ինչ քննարկում է Բրյուսելում և այն, ինչ հայտարարում է, ամբողջովին համապատասխանում է գործընթացին։ Մենք այս հարցում փորձում ենք հնարավորինս թափանցիկ լինել և հանրությանը տեղեկացնել միայն այն մասին, ինչ մենք քննարկում ենք»,- ասաց Գրիգորյանը։
Անդրադառնալով Թուրքիայի նախագահ Ռեջեփ Թայիփ Էրդողանի և Իլհամ Ալիևի հեռախոսազրույցի մասին տարածաված տեղեկություններին, որտեղ Ալիևը հայտնել էր, որ բրյուսելյան հանդիպմանը պայմանավորվել են «Զանգեզուրի միջանցքի» բացման շուրջ, ԱԽ քարտուղարն ասաց.
«Բրյուսելից եղել է պարզաբանում, որ միջանցքային տրամաբանությամբ որևէ քննարկում չի եղել: Ի դեպ, սրա մասին Մոսկվայի մեր գործընկերներն են ժամանակին հայտարարել: Ադրբեջանը բանակցություններին չհամապատասխանող հայտարարություններ է անում, բայց մենք կարող ենք հստակ ասել, որ մենք ինչ բանակցում ենք՝ հրապարակային կոմունիկացնում ենք»,- վստահեցրեց Գրիգորյանը:
