Ակնկալվում է, որ Դանիան հուլիսի 1-ից կկարողանա միանալ պաշտպանության և անվտանգության եվրոպական համագործակցությանը: Այս մասին այսօր հաղորդել է երկրի ԱԳՆ-ն։
Միանալու մասին պաշտոնական դիմում կարող է ներկայացվել միայն խորհրդարանի կողմից 1993 թվականի վերապահումը չեղյալ հայտարարելուց հետո, որը Դանիային խանգարում էր մասնակցել այս համագործակցությանը:
Խորհրդարանը կորոշի նաև ապագայում ԵՄ ռազմական գործողություններին երկրի մասնակցության հարցը։ Որպեսզի օրինագիծն ուժի մեջ մտնի, այն պետք է վավերացվի և հրապարակվի: Բացի այդ, մի շարք գործնական հարցեր պետք է հստակեցվեն, նախքան արտգործնախարարը ԵՄ անդամ մյուս երկրներին տեղեկացնի, որ Դանիան փոխել է իր դիրքորոշումը, բացատրվում է զեկույցում։
«Դանիացիներն ասել են իրենց խոսքը: Այժմ մենք կարող ենք լիովին մասնակցել պաշտպանության և անվտանգության հարցերով եվրոպական համագործակցությանը: Դրանով մենք ավելի մեծ պատասխանատվություն ենք ստանձնում մեր տարածաշրջանի անվտանգության համար: Սա լավ և կարևոր քայլ է: Միացյալ Եվրոպան լավագույն պատասխանն է, որը մենք կարող ենք տալ այն իրավիճակում, որում այսօր գտնվում ենք»,- ասել է Դանիայի արտգործնախարար Յեպպե Կուֆուդը։
Չորեքշաբթի օրը կայացած այս հարցի շուրջ հանրաքվեի ժամանակ դանիացիների մեծամասնությունը պաշտպանել է երկրի անդամակցությունը Եվրամիության շրջանակներում պաշտպանական համագործակցությանը։ Կողմ է քվեարկել ընտրողների 66,9%-ը, դեմ՝ 33,1%-ը։
Դանիան ԵՄ միակ երկիրն է, որը ներգրավված չէ պաշտպանական համագործակցության մեջ: Միաժամանակ երկրի իշխանությունները դեմ են միության բանակի ստեղծմանը։
