Ակնկալվում է, որ մինչև այս տարվա վերջը Երևան կհասնեն 150 նոր ավտոբուսներ:
«Արմենպրես»-ի հաղորդմամբ՝ այս մասին հայտարարեց Երևանի քաղաքապետ Հրաչյա Սարգսյանը ԱԺ-ում լրագրողների հետ կայացած զրույցում:
«Այս պահի դրությամբ խնդիր ունենք: Հիմա քաղաքում հիմնականում կապույտ ավտոբուսներն են երթևեկում, մանուշակագույն ավտոբուսների պահեստամասերի ձեռք բերման հետ կապված մրցույթը չի կայանում: Բայց, կարծում եմ, մոտ ժամանակում մենք որոշում կունենանք և որոշման համաձայն պահեստամասերը ձեռք կբերենք, և մանուշակագույն ավտոբուսները նույնպես կերթևեկեն, դրանց քանակն ավելի շատ կլինի: Ինչպես նաև հաջորդ շաբաթ նախատեսում ենք 8.6-մետրանոց 150 ավտոբուսների մրցույթ հայտարարել և ակնկալում ենք, որ մինչև դեկտեմբերի 30-ը այդ ավտոբուսները կլինեն Երևանում»,-ասաց քաղաքապետը:
Սարգսյանը հիշեցրեց, որ մեկ ամիս առաջ պայմանագիր են ստորագրել 12-մետրանոց ավտոբուսներ ձեռք բերելու համար: Ժամկետը 2023 թվականին մարտ-ապրիլ ամսներն են:
