«Մենք օրեր առաջ համալրեցինք մեր ավիացիոն պարկը, երրորդ օդանավը, որը ձեռք է բերել Fly One Armenia-ն՝ Airbus A319 դասի է, 144 տեղանոց»,- այս մասին այսօր հրավիրված մամուլի ասուլիսի ժամանակ հայտնեց Fly One Armenia ավիաընկերության խորհրդի նախագահ Արամ Անանյանը։
Անանյանի խոսքով նոր օդանավի ձեռքբերումը հնավարություն է տալու ընդլայնել թռիչքային աշխարհագրությունը, ներառել նոր ուղղություններ, բարձրացնել թռիչքների պարբերականությունը և մեր քաղաքացիներին, Հայաստան ժամանող հյուրերին, զբոսաշրջիկներին շատ ավելի որակյալ ավիացիոն ծառայություններ մատուցել, ինչը ավիաընկերության նպատակն է։
Այս պահին Fly One Armenia-ն չվերթներ է իրականացնում դեպի ՌԴ՝ Սոչի, Մոսկվա, Ստամբուլ, Թբիլիսի ինչպես նաև դեպի Փարիզ և Լիոն, որոնք վերսկսում են հունիսի 17-ից․
«Տեղյակ եք, որ խնդիրներ առաջացան Թուրքիայի օդային տարածքով տարանցման հնարավորության հետ կապված, խնդիրները հաղթահարվեցին և նաև մեր արտաքին գործերի նախարարության գործուն աջակցությամբ և միջամտությամբ մենք կարողանալու ենք վերսկսկել չվերթները, նախատեսում ենք այս տարի նաև ներառել Մերձավոր Արևելքի մի քանի կարևոր կենտրոններ՝ Թեհրանը, Բեյրութը և հնարավորության դեպքում էլ ավելի ընդլայնենք աշխարհագրությունը և պարբերականությունը, մեր նպատակը դեպի Հայաստան և Հայաստանից դուրս ուղևորահոսքի ավելացումն է և ամեն ինչ անելու ենք այդ նպատակին հասնելու համար»,- շեշտեց Անանյանը։
