Կառավարությունը հաստատեց ՀՀ սահմանամերձ բնակավայրերում ընտանիքների բնակարանային մատչելիության ապահովման պետական աջակցության 2022-2024 թվականների ծրագիրը։ Նախատեսված պետական աջակցությունը տրամադրվում է սահմանամերձ գյուղական բնակավայրում անհատական տուն կառուցելու դեպքում։
ՀՀ վարչապետ Նիկոլ Փաշինյանը նշեց, որ նախագծով եթե սահմանամերձ գյուղից ցանկացած բնակիչ հիպոտեկային վարկ է վերցնում 12 տոկոսի չափով և մայր գումարը 12 միլիոնի չափով՝ պետությունը սուբսիդավորում է:
Աշխատանքի և սոցիալական հարցերի նախարար Նարեկ Մկրտչյանը նշեց, որ այս ծրագիրը նաև չի հակադրվում երեխա ունեցող ընտանիքների բնակարանների ապահովության ծրագրին: «Քաղաքացին որոշել է, որ 20 միլիոնով պետք է տուն կառուցի, և 12 միլիոնը տրամադրվում է մեր կողմից, և եթե ունի երկու երեխա, հետո ծնվում է երրորդ երեխան՝ դառնում է մյուս ծրագրի շահառու և մինչև երկու միլիոն դրամ գումար մարման համար տրամադրվում է մյուս ծրագրից»,- ասաց նա, և վարչապետը լրացրեց, որ եթե գյուղացին զինվորական է, ավելի է մեծանում ծրագրերը:
«Այս պահերը մենք ճիշտ ենք, չէ՞, հասկանում, հետո ստուգո՞ւմ եք, որ չպարզվի՝ մենք սենց ճոխ-ճոխ ասու ենք, հետո սահմանափակումներ ենք գրել հետևի տողի մեջ»,- ասաց վարչապետը:
