ՀՀ վարչապետի տիկին Աննա Հակոբյանը մարզային այցի 2-րդ օրը սկսեց Դսեղ համայնքում։ Նա ծաղիկներ խոնարհեց հայ մեծանուն գրող Հովհաննես Թումանյանի արձանի մոտ։
Աննա Հակոբյանի գրասենյակից հայտնում, են, որ այնուհետև վարչապետի տիկինը ծանոթացավ գյուղում գործող Բնության այցելուների կենտրոնի աշխատանքին։ Կենտրոնի նպատակն է Դսեղում խթանել զբոսաշրջությունը, դարձնել համայնքի բնությունն առավել ճանաչելի։ Կենտրոնի հիմնական նպատակներից է նաև ներգրավել տեղի բնակչությանը զբոսաշրջության զարգացման գործընթացում։
Դսեղի միջնակարգ դպրոցում Աննա Հակոբյանին ներկայացրին հատապտուղների ինտենսիվ այգին, գորգագործության ու կավագործության խմբերի պարապմունքները:
Դսեղից հետո հաջորդ կանգառը Դեբետ գյուղն էր, որի համայնքապետարանի շենքը նորոգվել է COAF-ի միջոցներով։ Աննա Հակոբյանին ներկայացրին նաև գյուղի զարգացման ծրագրերն ու զբոսաշրջային գրավիչ վայր դարձնելու հնարավորությունները։ Դեբետում խելացի կանգառ կա, կառուցվում է նոր դպրոց ու մանկապարտեզ։ Մինչև դպրոցի շինարարության ավարտը համայնքի երեխաների դասերը կազմակերպվում են COAF սմարթ կենտրոնում։
COAF-ի տեսլականն է զարգացնել գյուղական համայնքները նորարության միջոցով և արագացնել գյուղերի տրանսֆորմացիան՝ դառնալով ներգաղթի վայրեր։ Այս գյուղերը կառաջարկեն կյանքի բարձր որակ՝ անընդհատ արդարացնելով և գերակատարելով բնակիչների բոլոր սպասելիքները, ովքեր էլ իրենց հերթին նպաստում են համայնքի զարգացմանը։ COAF-ը նպատակ ունի կառուցելու գյուղի սմարթ մոդել, որը կընդլայնի և կտարածվի։ Աննա Հակոբյանը այցելեց նաև COAF-ի սմարթ կենտրոն, որտեղ շրջայցի ժամանակ ներկայացրին կենտրոնի գործող և ապագա ծրագրերը։
Լոռու մարզ այցը վարչապետի տիկին Աննա Հակոբյանն ավարտեց Հաղպատի վանական համալիր այցելությամբ: Նրան դիմավորեցին Ալավերդու և Հաղպատավանքի հոգևոր հովիվ Տեր Միքայել քահանա Շաղոյանը, Ախթալայի Սուրբ Մարիամ Աստվածածին վանքի վանահայր Տեր Հեթում քահանա Թարվերդյանը։
Վարչապետի տիկինը շրջեց վանական համալիրում և ծանոթացավ դրա կառուցման պատմությանը։
Հաղպատաի վանական համալիրը համաշխարհային ժառանգության մաս է կազմում և գտնվում է ՅՈՒՆԵՍԿՕ-ի մշակութային ժառանգության ցանկում։
