Դիմել ենք Ազգային ժողով, որպեսզի համապատասխան հանձնաժողովը քննի երեկ առողջապահության նախարարությունում ընդդիմադիր պատգամավորների ցուցաբերած վարքագիծը:
Այս մասին այսօր լրագրողների հետ ճեպազրույցում ասաց առողջապահության նախարար Անահիտ Ավանեսյանը:
Գերատեսչության ղեկավարի խոսքով՝ ընդդիմադիր երեք կին պատգամավորների վարքագիծը բոլոր առումներով գռեհիկ է եղել և չի տեղավորվում պատգամավորի վարքագծի մեջ:
«Դիմել ենք Ազգային ժողով, որովհետև կարծում ենք՝ պատգամավորական մանդատը թույլ չի տալիս որևէ անձի դրսևորել խուլիգանական վարքագիծ: ԱԺ-ի համապատասխան հանձնաժողովը պետք է քննի այդ անձանց կողմից ընդհանուր առմամբ պատգամավորին ոչ հարիր գործելաոճ ունենալու հանգամանքը, և խստորեն արձագանք լինի դրան»,- ասաց նախարարը:
Նրա խոսքով՝ նշված պատգամավորները երբևէ հանդիպում չեն ցանկացել իր հետ և հնարավորության դեպքում անգամ հարց չեն ուղղել:
«ԱԺ-ն բաց է բոլորի համար: Նրանք 2021 թվականի ընտրությունների արդյունքում ընտրվել են պատգամավոր և պարտավոր են գալ իրենց աշխատանքի վայր, ունեն բոլոր հնարավորությունները հանդիպելու նախարարների հետ, ուղղելու հարցեր և քննադատություններ, բայց, չգիտես՝ ինչու, օրենքով սահմանված, քաղաքակիրթ երկրին բնորոշ հարթակները թողած անձինք ոչ թե հանդիպում են ուզում, այլ ուղղակի բեմականացված գռեհիկ շոուներ»,- նշեց նախարարը:
Ավանեսյանը հաստատեց բազմիցս իր կողմից՝ ոստիկանության ծառայողների գործելաոճի մասին՝ հնչեցրած գնահատականը՝ շեշտելով՝ ոստիկանական ուժերը և բոլոր իրավապահ մարմինները պետք է գործեն օրենքի շրջանակներում. «2018 թվականից սկսած՝ ՀՀ-ում ժողովրդավարության սկզբունքները պահպանվում են: Դրա վերաբերյալ ամեն տարի բազմաթիվ արձանագրումներ են լինում: Ժողովրդավարությունը չի նշանակում անօրինականություն, այլ օրենքի ուղիղ գերակայություն: 2018 թվականին տեղի ունեցած Թավշյա հեղափոխությունը արդեն իսկ բազմաթիվ անգամ արժանացել է բարձր արձագանքների և տեղավորվում է ժողովրդավարության սկզբունքներում»:
Պատասխանելով հարցին՝ հունիսի 3-ի միջադեպի ժամանակ ոստիկանության կիրառած լուսաձայնային նռնակների օգտագործումը ժողովրդավարության սկզբունքներին համապատասխանո՞ւմ է, թե՞ ոչ, նախարարը նշեց. «Ժողովրդավարությունը չի նշանակում անօրինականության թողտվություն: Երբ չկա պատշաճ վարքագիծ, պետք է կիրառվեն նաև վարչարարական միջոցներ»:
Հիշեցնենք՝ երեկ ՀՀ Ազգային ժողովի «Հայաստան» և «Պատիվ ունեմ» խմբակցության պատգամավորներ Քրիստինե Վարդանյանը, Ասպրամ Կրպեյանը և Աննա Մկրտչյանը ներս էին խուժել Կառավարության 3-րդ մասնաշենքում գտնվող առողջապահության նախարարության շենք։
Վերջիններս, չենթարկվելով շենքում անվտանգության ծառայություն իրականացնող ոստիկանների օրինական պահանջներին, նրանց խնդրանք-հորդորներին, անցնել էին անվտանգության ձողերի տակով, շարժվել դեպի առողջապահության նախարար Անահիտ Ավանեսյանի աշխատասենյակ, մտել նիստերի դահլիճ, վիրավորել նախարարին և գետնին թափել 44-օրյա պատերազմի ժամանակ զոհված տղաների մասունքների լուսանկարները:
