Ֆրանսիայի նախագահ Էմանուել Մակրոնը հաջորդ շաբաթվա ընթացքում կարող է մեկնել Կիև: Այս մասին հայտնում է Le Parisien օրաթերթը։
Ըստ պարբերականի, դա կարող է տեղի ունենալ Մակրոնի Ռումինիա կատարելիք այցից հետո: Մակրոնը մտադիր է հանդիպել Ռումինիայում տեղակայված ֆրանսիացի զինծառայողների հետ:
Ֆրանսիան լրջորեն քննարկում է Ռումինիայից հետո Ուկրաինա Մակրոնի այցի հնարավորությունը,- գրում է Le Parisien-ը: Թերթը նշում է, որ Ելիսեյան պալատը ոչ հերքում և ոչ էլ հաստատում է այդ այցի հնարավորությունը:
Հունիսի 9-ին տեղի է ունեցել Ֆրանսիայի և Ուկրաինայի նախագահներ Էմանուել Մակրոնի և Վլադիմիր Զելենսկու հեռախոսազրույցը:
Վերջերս Մակրոնն ասել է, թե պատրաստ է մեկնել Կիև, «եթե այդ այցը որևէ կերպ նպաստի ռուս-ուկրաինական համակարտության կարգավորմանը»:
Աղբյուրը՝ Azatutyun.am: