Ռուսաստանը դուրս է գալիս Զբոսաշրջության համաշխարհային կազմակերպությունից: Համապատասխան փաստաթուղթը հրապարակվել է իրավական տեղեկատվության պաշտոնական ինտերնետային հարթակում:
Այս մասին գրում է «Ռիա Նովոստի» -ն։
«Ընդունել ՌԴ ԱԳՆ-ի առաջարկը, որը համաձայնեցվել է գործադիր իշխանության շահագրգիռ դաշնային մարմինների հետ՝ Զբոսաշրջության համաշխարհային կազմակերպությունից ՌԴ-ի դուրս գալու վերաբերյալ»,- ասվում է փաստաթղթում։
Նշվում է, որ Զբոսաշրջության համաշխարհային կազմակերպությունը (UNWTO) ապրիլի վերջին կասեցրել է Ռուսաստանի անդամակցությունը։ Պատճառը Ուկրաինայում ռազմական հատուկ գործողությունն էր։ Միաժամանակ, կազմակերպությունից ամբողջությամբ դուրս մնալու մասին խոսք չի գնացել՝ համաձայն UNWTO կանոնադրության 34-րդ հոդվածի, անդամակցությունը կարող է վերականգնվել, եթե փոխվի Ռուսաստանի քաղաքականությունը։
Նույն օրը ՌԴ ԱԳՆ-ն հաստատել է UNWTO-ից դուրս գալու որոշումը։ Նախարարությունը նշել է, որ ԵՄ երկրները փաստացի մենաշնորհել են Զբոսաշրջության համաշխարհային կազմակերպությունը, այն օգտագործում են իրենց շահերի համար, ինչը Մոսկվան համարում է անօրինական և քաղաքական դրդապատճառներով քայլ՝ ցուցադրական պատժի համար։
