Amnesty International իրավապաշտպան կազմակերպությունը Խարկովում իրավիճակի վերաբերյալ նոր զեկույցում Ռուսաստանին մեղադրել է Ուկրաինայում ռազմական հանցագործություններ կատարելու մեջ:
Կազմակերպությունը նշում է, որ հարյուրավոր խաղաղ բնակիչներ են զոհվել քաղաքի ռմբակոծության ժամանակ կասետային զինամթերքի կիրառման հետևանքով։
Amnesty- ի պնդմամբ՝ անհերքելի ապացույցներ կան ռուսական բանակի կողմից կասետային ռումբերի և հակահետևակային ականների բազմակի օգտագործման մասին, որոնք արգելված են միջազգային կոնվենցիաներով:
Իրավապաշտպաններն ասում են, որ Խարկովի բնակելի թաղամասերը հրետակոծվել և ռմբակոծվել են պատերազմի առաջին իսկ օրից, և երկու ամսվա շարունակական հարվածների ընթացքում 1,5 միլիոնանոց քաղաքին հսկայական վնաս է հասցվել։ Մարդիկ սպանվել են իրենց տներում ու բակերում, խաղահրապարակներում ու գերեզմանատներում, մթերային խանութներում , դեղատներում ու անգամ մարդասիրական օգնության համար գոյացած հերթերում։
Մոսկվան իր հերթին բազմիցս հերքել է արգելված զինամթերքի օգտագործման վերաբերյալ լուրերը։
