Սույն թվականի հուլիսի 1-ից ուժի մեջ մտնող Քրեական օրենսգիրքը այլևս պատասխանատվություն չի նախատեսում ծանր վիրավորանքի համար: Այդ անընդունելի երևույթի համար կպահպանվի միայն քաղաքացիական պատասխանատվությունը՝ մինչև 3 միլիոն դրամի չափով:
Այս մասին այսօր ՀՀ Ազգային ժողովում լրագրողների հետ զրույցում պետական-իրավական հարցերի մշտական հանձնաժողովի նախագահ Վլադիմիր Վարդանյանը, անդրադառնալով այս որոշմանը, հույս հայտնեց, որ կահավորումը և քրեական գործերի առկայությունը մեզ հնարավորություն կտան ավելի քիչ քանակով հայհոյանք լսել ապագայում:
Հարցադրմանը՝ գործող քրեական գործերը, որոնք այդ հոդվածով էին հարուցված, ի՞նչ ընթացք են ստանալու, պատգամավորն ասաց՝ եթե ապաքրեականացվում է, ապա գործերը կարճվում են:
«Հայհոյանքը դարձել էր քաղաքական խոսույթի մի մաս, ուստի անհրաժեշտ էր միջոցներ ձեռնարկել: Ո՛չ Եվրոպական դատարանը, ո՛չ որևէ միջազգային ստանդարտ չի կարող ընդունել հայհոյանքը որպես խոսքի ազատության անթույլատրելի սահմանափակում։ Ոչ մի միջազգային ճնշում չի եղել, սպասում ենք ՍԴ որոշմանը: Մենք նախագծի քննարկման ժամանակ ասում էինք, որ այն որպես ժամանակավոր միջոց ենք կիրառելու, որպեսզի ատելության խոսքի հետ կապված իրավիճակը շտկվի»,- նշեց Վարդանյանը՝ ընդգծելով, որ օրենքը որոշակի կանխարգելում իրականացրեց վիրավորանքի և ատելության հարցում։
Հարցադրմանը՝ ունե՞ն վիճակագրություն, որն ապացուցում է՝ նախկինում ավելի շատ էր հայհոյանքը, քան հիմա, Վարդանյանն ասաց՝ վիճակագրություն չունեն, սակայն պարզելը հեշտ է:
«Եթե դուք ուսումնասիրեք ձեր շուրջը, հայտարարություններ կարդաք, ելույթներ լսեք, կտեսնեք»,- ասաց նա: