«Ակցիաները պետք է լինեն արտոնված և չպետք է վերածվեն զանգվածային անկարգությունների: Իշխանությունները քաղաքացիների կողմից մեծ ճնշման տակ են, պահանջում են, որ երթևեկությունը կարգավորվի և քաղաքացիներն անհարմարություններ չկրեն: Զանգելով և ցանկացած հանդիպման ու շփման ժամանակ քաղաքացիներն ասում են՝ բացե՛ք փողոցները, Երևանի երթևեկությունը վերականգնե՛ք»:
Այսօր ԱԺ-ում լրագրողների հետ զրույցում այս մասին այս «Քաղաքացիական պայմանագիր» խմբակցության պատգամավոր Արմեն Խաչատրյանը՝ չբացառելով, որ ցուցարարների վրանները հավաքելու որոշում կկայացվի:
Պատգամավորը ոստիկանության գործողությունները իրավաչափ է որակում, անգամ, ըստ նրա, սահմանված չափից ավելի հանդուրժող են: Անդրադառնալով հունիսի 3-ին Դեմիրճյան- Պռոշյան փողոցների խաչմերուկում ցուցարարների և ոստիկանության միջեւ տեղի ունեցած բախումներին, նա նշեց, որ դա ամենաթեթև հատուկ միջոցներից էր, որ կարող էր այդ պահին կիրառվել:
«Բայց ոստիկանության գործողություններին գնահատական տալու համար եկեք հետ գնանք 1,5 ամիս առաջ, ոստիկանությունն արդեն 1,5 ամիս է օրուգիշեր ծանրաբեռնված ռեժիմով հասարակական կարգն է ապահովում և որևէ անգամ հատուկ միջոց չի կիրառել, անգամ հատուկ պաշտպանական միջոց չի կիրառվել՝ սաղավարտ, ռետինե մահակ և այլն:
Բայց, երբ մենք տեսանք, որ ոստիկանության այդ գործողությունները բերում են այն արդյունքին, որ զանգվածային անկարգություններ են տեղի ունենում, այսինքն ոստիկանության գործողությունները չեն նախականխել զանգվածային անկարգությունները, հետևաբար ոստիկանությունը պետք է իր մարտավարությունը կոշտացնի, ինչն էլ արել է: Թեև այդքան էլ կոշտ չի եղել, ոստիկաններն ավելի շատ տուժեցին այդ ամենից: Կրկնում եմ՝ ոստիկանությունը գործել է պրոֆեսիոնալ և հանդուրժողական, գուցե ավելորդ հանդուրժողական»,-ասաց նա:
