Հայաստանում ռազմաուսումնական հաստատությունն ավարտողները, անկախ ծառայության նշանակման վայրից, Երևանում կստանան 3 սենյականոց բնակարան: Այս մասին այսօր ԱԺ հայտարարությունների ժամին ասել է ՀՀ Ազգային ժողովի «Քաղաքացիական պայմանագիր» խմբակցության պատգամավոր Արմեն Խաչատրյանը:
«Մի քանի օր հետո ԱԺ կմտնի համապատասխան օրենքի նախագիծ, որով սահմանվում է, որ, սկսած 2022 թվականի հուլիսի 1-ից, ՀՀ ռազմաուսումնական հաստատություններ ընդունված մեր ապագա սպայական կազմի ներկայացուցիչների համար պետությունն անվարձահատույց տրամադրելու է 3 սենյականոց բնակարան Երևան քաղաքում»,- մանրամասնել է պատգամավորը։
Խաչատրյանը նաեւ ընդգծել է՝ կապ չունի, թե սպան որտեղ է նշանակվելու ծառայության՝ Տավուշի՞, Սյունիքի՞, թե՞ Վայոց ձորի մարզում, նա ավարտելուց հետո Երևանում ունենալու է 3 սենյականոց բնակարան:
Վերջինս կոչ է արել 18-23 տարեկան երիտասարդներին դիմել ռազմաուսումնական հաստատություն. «Վերջին տասնամյակների ամենամեծ ու նշանակալի բարեփոխումն է սա սպայական «կորիզը» ձևավորելու գործում»:
Նշենք, որ համապատասխան նախագիծը հավանություն էր ստացել Կառավարության հունիսի 2-ի նիստում:
