Գյումրիում տրանսպորտային համակարգը շուտով կարդիականացվի։
«Հայկական ժամանակ»-ի հետ զրույցում նման վստահություն է հայտնում Գյումրու համայնքապետ Վարդգես Սամսոնյանը:
Դեռ նախորդ տարի սուբվենցիոն ծրագրով է համայնքը 65 նոր տրանսպորտային միջոց ձեռք բերել, սակայն պատասխանատուների՝ մայիսի վերջ հունիսի սկիզբ նոր երթուղային ցանցի գործարկման խոստումը դեռ չի կատարվել:
«Կանգնած մեքենաները լուրջ ծախսեր չեն պահանջում, նախ դրանք երաշխիքային ժամկետում են: Տեխզննում են անցել և 2022-ի համար խնդիրներ չունեն»,- նկատում է համայնքապետը:
Նոր միկրոավտոբուսների արագ շահագործումը դեռ չի հաջողվում տարբեր պատճառներով՝ և՛ ավտոպարկի շինարարությունը դեռ ավարտին չի հասել, և՛ մեքենաների հետ կապված որոշ հարցեր են մնացել կարգավորելու:
Դրանից զատ՝ ձևավորվել է «Գյումրի ավտոբուս» ՓԲԸ-ն, որը կազմավորման փուլում է և աշխատանքի է հրավիրում փորձառու վարորդների՝ D կարգի վարորդական վկայականով, մեխանիկների՝ համապատասխան փորձով և որակավորմամբ, ավտոէլեկտրիկների, ենթակարգավարների, ավտոլվացողների, բուժակների և հաշվապահի:
«Ուզում ենք բոլոր խնդիրները լուծած դուրս գալ երթուղի: Վարորդները կոկիկ լինեն, ուղևորների հետ խնդիրներ չունենան, հեռախոսով չխոսեն, չծխեն: Վերահսկելու ենք, որ նախկին խնդիրները չլինեն»,- ընդգծում է Գյումրու համայնքապետարանի աշխատակազմի տրանսպորտի բաժնի առաջատար մասնագետ Արամ Սարուխանյանը:
Գյումրու նոր երթուղային ցանցի շահագործման համար ձեռք բերված մեքենաներում 16 մլն 285 հազար դրամի շրջանակներում արդեն տեղադրված են տեսահսկող և մետաղադրամ ընդունող սարքերը: Վարորդները գումարի հետ գործ չեն ունենալու, քաղաքացին միկրոավտոբուս է բարձրանալու՝ իր մոտ ունենալով 100 դրամանոց մետաղադրամ, որը ոչ թե վարորդին է փոխանցելու, այլ գցելու է սարքի մեջ:
Առկա խմբաքանակով, սակայն, հնարավոր չի լինի Գյումրու երթուղային ամբողջ ծանրաբեռնվածությունը կարգավորել: Նորմալ աշխատանքի համար ևս 20 միկրոավտոբուս է պետք: Սարուխանյանն ասում է՝ այս պահին քննարկում են՝ ֆինանսական ինչ միջոցներով է հնարավոր այդ հարցի լուծումը:
Գյումրու համայնքապետ Վարդգես Սամսոնյանն էլ այդ 20-ից բացի՝ 5 այլ փոխադրամիջոցի ձեռք բերման մտադրության մասին է տեղեկացնում:
«Կայուն կանաչ զարգացման ծրագրի շրջանակներում 5 էլեկտրոավտոբուս ենք ստանալու, մեկ այլ ծրագրով էլ էլեկտրոավտոբուս կստանանք, որ կարողանանք ցանցը հագեցած դարձնել»: Այդ կերպ կլինի 85 մեքենա, և դա բավարար է Գյումրիում երթուղային ցանցի շահագործման համար: Դրանք 7 երթուղի կսպասարկեն, կունենան հստակ ժամանակացույց»,- վստահ է պատասխանատուն:
Ներկա պահին, ըստ Սարուխանյանի, Գյումրին 87 տրանսպորտային միջոց է սպասարկում, անկախ խնդիրներից, ըստ նրա, սպասարկումը նորմալ է: Իսկ այն, որ երեկոյան ժամերին հատկապես կան երթուղայիններ, որոնք ընդհանրապես չեն աշխատում, Սարուխանյանը նորմալ է համարում, սակայն հստակեցնում է՝ ոչ թե չկան, այլ դրանց թիվն է պակասում:
Հարկ է նկատել, որ, օրինակ, Մսիկ կոմբինատ թաղամասը սպասարկող թիվ 14 համարի երթուղայինն աշխատանքը լավագույն դեպքում ավարտում է ժամը 18:00-ին, թիվ 12-ն աշխատում է մի փոքր ավելի երկար, ըստ գյումրեցիների՝ մինչև 19:00, շաբաթ-կիրակի օրերին՝ մինչև 18:00-ն:
«Դե էդ ժամերին մարդկանց թիվն էլ է նվազում: 1-2 քաղաքացու համար ամբողջ երթուղին սպասարկելը մի քիչ ոչ ձեռնտու է»,- ասում է համայնքապետարանի պատասխանատուն:
Նոր երթուղայինների պարագայում սպասարկումը նախատեսվում է մինչև 21:00 կամ մի փոքր ավելի: Երթուղային 9 ցանցի փոխարեն նորերը կսպասարկեն 7-ը: Երբ ամեն ինչ կհստակեցվի, ժամն ու գրաֆիկն էլ հայտնի կդառնան: Սարուխանյանը չի կարծում, որ երկար աշխատանքի պարագայում, օրինակ, մինչև 24:00-ն կլինեն քաղաքացիներ, որոնք կօգտվեն երթուղայիններից: «Ուղղակի դատարկ երթևեկելու են»,- ասում է նա:
85 մեքենայի հաշվարկով նվազագույնը 160 վարորդ կաշխատի Գյումրիում: Նրանք երթուղի են դուրս գալու հերթափոխով, յուրաքանչյուրը՝ 200.000 դրամ աշխատավարձով: Թվի մեջ, ըստ պատասխանատուի, ներառնված են բոլոր հարկերը:
Նաեւ վստահեցնում են՝ կլինի հանրային փոխադրամիջոց հաշմանդամություն ունեցողների, մասնավորապես՝ սայլակով, քայլակով կամ հենակով տեղաշարժվողների համար:
