Երևանի պետական համալսարանի գիտական աստիճան ստացած մի խումբ շրջանավարտների հունիսի 15-ին Ալ. Սպենդիարյանի անվան օպերայի և բալետի ազգային ակադեմիական թատրոնում ավարտական դիպլոմներ տրվեցին: Դիպլոմները հանձնեցին ՀՀ պաշտպանության նախարար, ԵՊՀ հոգաբարձուների խորհրդի նախագահ Սուրեն Պապիկյանն ու ԵՊՀ ռեկտոր Հովհաննես Հովհաննիսյանը:
Հանդիսավոր արարողությանը Հովհաննես Հովհաննիսյանը, դիմելով շրջանավարտներին, ասաց, որ նրանց պետք է համակի հպարտության զգացումը, քանի որ կրթական ու գիտական փառավոր պատմություն ունեցող Մայր բուհում անցկացրած տարիները եղել են ոչ միայն մասնագիտություն ստանալու, այլև ինտելեկտուալ բացահայտումների, անթիվ ձեռքբերումների, անմնացորդ նվիրումի և որպես քաղաքացի լիարժեք ձևավորվելու ժամանակաշրջան:
«Ձեր գործունեությամբ դուք պետք է նպաստեք ավելի արդար, կիրթ հասարակություն, առավել հզոր ու բարեկեցիկ երկիր ձևավորելու գործին: Պետք է միշտ հիշել, որ մարտահրավերներին դիմակայելու համար անհրաժեշտ են գիտելիք, հմտություն, երևակայություն և ստեղծագործականություն»,-շեշտեց ռեկտորը և հավելեց՝ գիտության ոլորտի ֆինանսավորման նշանակալի ավելացման կառավարության որոշումը, ԵՊՀ-ում իրականացված բարեփոխումներն ու նոր ծրագրերը վկայում են, որ մեր երկրում գիտությամբ զբաղվելը պատվաբեր է:
Նա շեշտեց, որ ապագայի կերտման ճանապարհին ԵՊՀ-ն շրջանավարտների գործընկերն ու աջակիցն է լինելու:
ՀՀ ԿԳՄՍ նախարար Վահրամ Դումանյանն էլ նշեց, որ պետք է երախտապարտ լինել նրանց, ովքեր հիմնադրել են ԵՊՀ-ն 103 տարի առաջ, այն սերունդներին, որոնք ներդրում ունեն համալսարանի կայացման, զարգացման ու միջազգային ճանաչման գործում: «Վստահ եղեք, որ կրթությունն է ամենակարևոր ոլորտը: Բոլոր խնդիրների լուծման բանալին թաքնված է ճիշտ կրթության մեջ, որն սկսվում է մանկապարտեզից, իսկ դուք երկրի մտավոր, ինտելեկտուալ ու լայն իմաստով անվտանգության երաշխավորներն եք»,-ասաց նախարարը:
Շրջանավարտներին շնորհավորելու էր եկել ՀՀ վարչապետ Նիկոլ Փաշինյանը: Նրա խոսքով՝ ԵՊՀ-ն ավարտելը շատ կարևոր իրադարձություն է յուրաքանչյուր ուսանողի կյանքում: «Ցանկանում եմ հիշեցնել, որ Հայաստանի՝ մինչև 2050 թվականի վերափոխման ռազմավարության մեջ մենք խնդիր ենք առաջադրել, որ առնվազն երեք հայաստանյան բուհ պետք է տեղ գտնի բուհերի միջազգային վարկանիշի առաջին 200 հորիզոնականում: ԵՊՀ-ն այդ ցուցանիշի ապահովման հավակնորդներից է: Կրթությունը և կրթության ոլորտի բարեփոխումները ամենառազմավարական լուծումն են, որ պետք է զարգացնի Հայաստանի կառավարությունը: Կարևոր է, որ նմանատիպ միջոցառումները ոչ միայն օգտագործենք միմյանց շնորհավորելու, այլև մեր առաջիկա անելիքները ճշգրտելու, օրակարգի իրականացման համար եռանդով տոգորվելու համար»,-շեշտեց վարչապետը:
Նիկոլ Փաշինյանը ՀՀ վարչապետի հուշամեդալներ և շնորհակալագրեր հանձնեց ԵՊՀ-ի պրոֆեսորադասախոսական կազմի մի խումբ ներկայացուցիչների՝ ևս մեկ անգամ շնորհավորելով թե՛ շրջանավարտներին, թե՛ դասախոսներին:
Բուհի ռեկտոր Հովհաննես Հովհաննիսյանն էլ ասաց, որ միջոցառման պատվավոր հյուրն է հայազգի անվանի գիտնական, Նոբելյան մրցանակակիր Արտեմ Փաթափությանը։ Ռեկտորը հայտարարեց, որ ԵՊՀ գիտական խորհրդի որոշմամբ՝ Փաթափությանին տրվում է ԵՊՀ պատվավոր պրոֆեսորի կոչում:
Փաթափությանը խոստովանեց, որ շատ շոյված է նման վերաբերմունքից ու ընդունելությունից: Նա ասաց, որ իր համար մեծ պատիվ է Հայաստան վերադառնալը, երկիր, որը մեծ հոգի ունի: «Եթե 18 տարեկանում, երբ ես մեկնեցի ԱՄՆ, ինձ ասեին, որ կարժանանամ Նոբելյան մրցանակի և կկանգնեմ այստեղ, կկարծեի, որ կատակում են»,-ասաց նա:
Փաթափությանի խոսքով՝ հաջողության հասնելու կարևոր գրավականներից են կրթությունը, քրտնաջան աշխատանքը, նվիրված ուսուցիչներն ու դասախոսները: Նրա կարծիքով՝ պետք է հավատալ ուժերին, զբաղվել սիրած աշխատանքով ու նվիրվել դրան:
Երեկոն եզրափակվեց համերգային ծրագրով: Մշակութային համարներով հանդես եկան սիրված ու ճանաչված մշակութային գործիչներ, որոնց թվում՝ Տիգրան Մանսուրյանը, Հայաստանի պետական սիմֆոնիկ նվագախումբը (գեղարվեստական ղեկավար և դիրիժոր՝ Սերգեյ Սմբատյան), Գոռ Սուջյանը, Ջուլիանա Գրիգորյանը, Ռուսլան Էլյազյանը, դիրիժոր Հարություն Արզումանյանը։
Աղբյուրը՝ Արմենպրեսի
Իրանի արտաքին գործերի նախարար Սեյեդ Աբաս Արաղչին հայտարարել է, որ Իսրայելի դեմ ռազմական գործողություններն ավարտվել…
Իրանը բալիստիկ հրթիռներ է արձակել Իսրայելի ուղղությամբ։ Իսրայելի բանակը պաշտոնապես հաստատել է հրթիռների արձակման փաստը և…
Ամբողջ աշխարհում հոկտեմբերը նշվում է` որպես կրծքագեղձի քաղցկեղի իրազեկման ամիս: Նպատակն է բարձրացնել հանրության տեղեկացվածությունը…
Ազդարարման համապետական արշավի շրջանակներում՝ ավելի քան 300 ՏԻՄ ներկայացուցիչների հետ անցկացվել են իրազեկման միջոցառումներ ՀՀ…
ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր հանդիպել է 2024-2025 թթ. «Սփյուռքի…
Հայաստանի համար Իրանը եղել եւ մնում է առանձնահատուկ գործընկեր, որն իր հավասարակշռված քաղաքականությամբ նպաստում է…