Կառավարության այսօրվա նիստում որոշում կայացվեց պահուստային ֆոնդից ԿԳՄՍ նախարարությանը հատկացնել 338 միլիոն 100 հազար դրամ, որը կուղղվի մարզիչների, մարզիկների սպորտային նպաստների տրամադրմանը:
ԿԳՄՍ նախարար Վահրամ Դումանյանի խոսքով՝ սպորտային նպաստի հատկացումը կնպաստի ծրագրի շրջանակում ընդգրկված շահառուների սոցիալական վիճակի բարելավմանը, ինչը որոշակիորեն կլուծի շահառուների առօրյա խնդիրները՝ նրանց համար դառնալով բարձր նվաճումների խթան:
«Վերոնշյալ կարգավորումը կնպաստի «Փարիզ 2024» օլիմպիական խաղերին և վարկանիշային մրցաշարերին, Եվրոպայի և աշխարհի առաջնություններին Հայաստանի Հանրապետության հավաքական թիմերի լավագույնս նախապատրաստվելուն և մասնակցության ապահովմանը, ինչպես նաև բարձր արդյունքների ձեռքբերմանը՝ բարձրացնելով Հայաստանի Հանրապետության վարկանիշը համաշխարհային մրցահարթակներում»,- վստահեցրեց ԿԳՄՍ նախարարը:
ՀՀ վարչապետ Նիկոլ Փաշինյանն էլ ներկայացրեց գնահատման սանդղակը:
«Խոսքը տիտղոսակիր մարզիկների մասին է: Այս կարգը կգործի այնքան ժամանակ, քանի մարզիկը պահպանել է տիտղոսը: Օլիմպիական խաղերի չեմպիոնների համար առանձին կարգ ունենք, և այդ կարգը գործում է: Օլիմպիական խաղերի 2-րդ մրցանակակիրներին ամիսը կվճարվի 500 հազար դրամ, 3-րդ տեղը զբաղեցրածներին՝ 400 հազար դրամ: Օլիմպիական վարկանիշներ հաղթահարածները կստանան 300 հազար դրամ նպաստ: Աշխարհի առաջնությունում 1-ին տեղը զբաղեցրածները կստանան 500 հազար դրամ, 2-րդ տեղը՝ 400 հազար դրամ, 3-րդ տեղը՝ 300 հազար դրամ»,- ասաց Փաշինյանը:
