Կառավարությունն այսօրվա իր հերթական նիստում 4 միլիարդ 267 միլիոն դրամ հատկացրեց ՏԿԵ նախարարությանը մոտ 53.1 կմ ճանապարհի նորոգման աշխատանքներն ավարտելու համար:
ՀՀ ՏԿԵ նախարար Գնել Սանոսյանը նշեց, որ խոսքը տարբեր մարզերում միջպետական, հանրապետական և տեղական նշանակության ճանապարհների մասին է:
«53.1 կմ-ից 35.4 կմ-ը նախորդ՝ 2021 թվականի անավարտ մնացած ճանապարհներն են, որոնք հիմա ավարտում ենք և պետք է վճարենք շինարարներին, իսկ 17.7 կմ-ը հիմա ենք սկսում, այս տարի կանենք, կավարտենք»,- ասաց Սանոսյանը:
ՀՀ վարչապետ Նիկոլ Փաշինյանն էլ հարցը քննարկելիս անդրադարձավ մի շարք նոր կառուցված ճանապարահների, որոնց գործարկման ընթացքում խնդիրներ են առաջացել:
«Պետք է հստակ լծակներ դրվեն, որովհետև՝ միլիարդներ ենք դրել ճանապարհաշինության մեջ, հետո էլ պարզվում է, որ որակով չեն արել, մենք էլ ժամանակը կորցնում ենք, նրանք վերականգնում են, մենք նորից նույն գումարը տանում վճարում ենք: Ինչո՞ւ պետք է որևէ աշխատանքի որակի խնդիր լինի: Ի՞նչ է նշանակում՝ աշխատանքը գնանք իրականացնենք, պետությունն այդքան փող դնի, ռեսուրս օգտագործի, վերջում պարզվի, որ աշխատանքը որակյալ չէ»,-ասաց Փաշինյանը և հավելեց. «Ով այդ կազմակերպությանն ասի՝ հա դե, որակյալ չէ, բա «ներողությունն» ինչի համար է, փողը տվեք կանենք: Չի կարող այդպես լինել, մենք նաև որոշակի վարքագիծ պետք է պարտադրենք ընկերություններին: Ժամկետներ են ձգձգում, չգիտեմ՝ օբյեկտիվ սուբյեկտիվ պատճառներով: Այդ ամեն ինչը պետք է ռեյտինգավորում անցնի, որ մենք տեսնենք՝ այս ընկերության հետ կառավարությունն ուզում է գործ ունենալ, թե ոչ»:
Ֆինանսների նախարար Տիգրան Խաչատրյանն էլ հայտնեց՝ ուշացումների համար տուգանքներ կան նախատեսված շինարարների համար: ՏԿԵ նախարար Գնել Սանոսյանն էլ հայտնեց, որ 2022 թվականին 47 մլրդ դրամ է բյուջեից հատկացվել ճանապարհաշինության համար, իսկ շինարարներին գումարները վերջնական չեն տալիս, քանի դեռ թերությունները չեն շտկվում:
