Համացանցում լուսանկարներ են հայտնվել հայկական կողմի՝ դեռևս 2021 թվականի դեկտեմբերի 25-ին տարածքային կոմունիկացիաների բացմանը միտված՝ ադրբեջանական կողմին ներկայացված փաստաթղթից: Ինչպես նկատելի է հրապարակված փաստաթղթի կետերից մեկում, հայկական կողմը պատրաստակամություն է հայտնել կառուցել անհրաժեշտ ավտոճանապարհների այն հատվածները, որոնք կապահովեն Մինջիվան-Օրդուբադ ճանապարհային լիարժեք կապը:
Մեկ այլ կետի համաձայն էլ՝ փաստաթղթում նշված բոլոր ավտոճանապարհներն ու երկաթուղիները պետք է շահագործվեն այն երկրների սուվերենության հիման վրա, որի տարածքում դրանք գտնվում են։ Այսինքն՝ ճանապարհների ապաշրջափակումը չի ենթադրում միջանցքային տրամաբանություն։
Մամուլի հրապարակումների համաձայն՝ հայկական կողմը հանդես է եկել տարածքային կոմունիկացիաները բացելուն միտված կառուցողական առաջարկով, սակայն ադրբեջանական կողմն այն չի ստորագրել:
Հայկական կողմի ներկայացրած կետերը:
1. Կողմերը պայմանավորվել են վերականգնել Երասխ-Ջուլֆա-Օրդուբադ-Մեղրի-Հորադիզ երկաթուղին՝ տրանսպորտային միջոցների և բեռների փոխադրման համար: Աշխատանքային խումբը եռամսյա ժամկետում կապահովի համապատասխան նախնական տեխնիկա-տնտեսական միջոցներն ու կհաստատի այս նախագծի իրականացման միջոցառումների ծրագիրը:
2. Կետ 1-ով սահմանված երկաթուղային գծի վերականգնումից հետո կողմերը բացում են երկաթուղային հաղորդակցությունը Հայաստանի, Ադրբեջանի և Ռուսաստանի միջև, ինչպես նաև այլ ուղղություններով բեռների և տրանսպորտային միջոցների տեղափոխումն ապահովելու համար, այդ թվում՝ երրորդ երկրների երկաթուղային ենթակառուցվածքները օգտագործելու միջոցով:
3. Երկաթուղային հաղորդակցության բացումը բոլոր ուղղություններով սահմանվում է 3 կողմերի համատեղ համաձայնությամբ:
4. Կետ 1-ում սահմանված երկաթուղային ուղեգծի շինարարության և վերականգման համար նախատեսված տրանսպորտային միջոցների և բեռների տեղափոխումը կարող է իրականացվել նաև երրորդ երկրներում առկա երկաթուղային ենթակառուցվածքների միջոցով: Նման փոխադրումների ժամկետի սկիզբը նախանշվում է կողմերի համատեղ համաձայնությամբ:
5. Կողմերը պայմանավորվել են իրականացնել ավտոմոբիլային բեռնափոխադրումներ Գորիս-Քարահունջ-Էյվազլի-Զանգիլան-մինչև Հորադիզի երկաթուղային կայարան ուղղությամբ այդ բեռների հետագա տեղափոխման համար երկաթուղային ճանապարհով կամ հետագայում Ադրբեջանի Հանրապետությունից դեպի Ռուսաստանի Դաշնություն տանող ավտոմոբիլային ճանապարհով և հակառակ ուղղությամբ:
6. Կողմերը պայմանավորվել են իրականացնել ավտոմոբիլային բեռնափոխադրումներ Էյվազլի-Քարահունջ-Անգեղակոթ-Բիչենեկ և հակառակ ուղղություններով:
7. Կետ 5-ում և 6-ում սահմանված ավտոմոբիլային փոխադրումների մեկնարկի մասին ժամկետները սահմանվելու են կողմերի համատեղ համաձայնությամբ:
8. Հայկական կողմը պատրաստակամություն է հայտնել կառուցել անհրաժեշտ ավտոճանապարհների այն հատվածները, որոնք կապահովեն Մինջիվան-Օրդուբադ ճանապարհային լիարժեք կապը, որոնք նախագծված կլինեն ավելի օպտիմալ տարբերակներով՝ հաշվի առնելով առկա և կառուցվող ճանապարհային ենթակառուցվածքների տեղակայումը, կլիմայական պայմանները, հեռավորությունը, տեղի ռելիեֆը, թողունակության հնարավորությունները, բայց միաժամանակ այն չի անցնի Հայաստանի Հանրապետության պետական սահմանի մոտով և Մեղրիով անցնող սահմանային երկաթուղային ճանապարհով: Աշխատանքային խումբը եռամսյա ժամկետում կապահովի աշխատանքների համար անհրաժեշտ նախնական տեխնիկա-տնտեսական հնարավորությունները և կհաստատի այս նախագծի իրականացման միջոցառումների ծրագիրը:
9. Բոլոր ավտոմոբիլային և երկաթուղային ճանապարհները՝ նշված այս հայտարարության մեջ, գործողության մեջ կմտնեն՝ պահպանելով բոլոր երկրների սուվերենիտետն ու ազգային իրավասությունները, որոնց տարածքներով կանցնեն:
10. Ավտոմոբիլային և երկաթուղային ճանապարհների կառուցումն ու վերականգնումը, որը նախանշված է այս հայտարարությամբ, կիրականացվի այն երկրի միջոցների հաշվին, որով անցնելու է:
11. Կողմերը կգործեն իրենց ուժերի կոորդինացմամբ և փոխադարձ համագործակցությամբ ավտոմոբիլային և երկաթուղային ճանապարհների շինարարական և վերականգման աշխատանքների ժամանակ՝ նշված այս հայտարարության մեջ:
12. Կողմերը կնախաձեռնեն համապատասխան անհրաժեշտ և պարտադիր պայմաններ՝ ապահովելու համար քաղաքացիական անձանց, տրանսպորտային միջոցների և բեռների անվտանգ տեղափոխումն ու տեղաշարժը կողմերի տարածքներով:
Լուսանկարները՝ Հայկական Ժամանակի։
Սկզբնաղբյուրը՝ Հայկական Ժամանակի։
