Պաշտպանության նախկին փոխնախարար, ՀՀԿ-ական նախկին պատգամավոր Արտակ Զաքարյանը հունիսի 21-ին ֆեյսբուքյան իր էջում գրել է, որ Հայաստանում կտրուկ աճել է ինքնասպանությունների թիվը:
«Միայն վերջին վեց ամսում, ըստ հրապարակումների, ինքնասպանության միջոցով մահացել են 30 քաղաքացիներ, իսկ 11 քաղաքացու ինքնասպանության փորձը հաջողվել է կանխել»,- գրել է նա։
Զաքարյանի գրառումը հրապարակել են armday.am, livenews.am, mediahub.am լրատվական կայքերը։
Ինքնասպանությունների դինամիկան Հայաստանում
Ըստ Վիճակագրական կոմիտեի տվյալների, որոնք ստացվում են ոստիկանությունից, Հայաստանում ինքնասպանությունների թիվը վերջին տասնամյակում տատանվել է 150-ից 215-ի միջև։ Տարեկան միջինը կազմել է 186։
2011-ից այս կողմ ամենաշատ ինքնասպանությունները գրանցվել են 2012-ին՝ 214, իսկ ամենաքիչը 2019-ին՝ 153։
Զաքարյանի պնդումը սխալ է
Զաքարյանի պնդումը, թե Հայաստանում կտրուկ աճել է ինքնասպանությունների թիվը, անհիմն է։
Կոմիտեն ինքնասպանությունների վիճակագրությունը հրապարակում է վեցամսյա հաճախականությամբ, իսկ այս տարվա վեց ամիսների տվյալները դեռ չեն հրապարակվել, քանի որ դեռ չի վերջացել հունիս ամիսը։
Զաքարյանը որպես աղբյուր նշում է «ըստ հրապարակումների», որոնց հղում, սակայն, գրառման մեջ չկա։
Իսկ եթե հիմք ընդունենք Զաքարյանի նշած թիվը (30), առավել ևս չի աճել ինքնասպանությունների թիվը։ Վերջին երեք տարիներին՝ 2019, 2020, 2021, հունվար-հունիս ամիսներին, Հայաստանում գրանցվել է, համապատասխանաբար, 86, 87 և 88 ինքնասպանություն։
Այսինքն, նախորդ երեք տարիների հունվար-հունիս ամիսներին, Զաքարյանի թվի համեմատ, գրեթե երեք անգամ ավել ինքնասպանություն է գրանցվել։ Հետևաբար, խոսք չի կարող լինել ինքնասպանությունների կտրուկ աճի մասին։
Աղբյուրը՝ Civilnet.am։
