ՀՀ կառավարության 2021-2026 թթ. գործունեության ծրագրով եւ դատաիրավական բարեփոխումների ռազմավարությամբ նախատեսված է փաստաբանության ոլորտում բարեփոխումների իրականացում` որպես կարեւոր ռազմավարական նպատակ։ Այս մասին, ըստ ՀՀ ԱԺ կայքի, ասել է Արդարադատության նախարարի տեղակալ Գրիգոր Մինասյանն ԱԺ մարդու իրավունքների պաշտպանության եւ հանրային հարցերի մշտական հանձնաժողովի հունիսի 21-ի արտահերթ նիստի ժամանակ։
Կառավարությունը փոփոխություններ ու լրացումներ է նախատեսում «Փաստաբանության մասին» օրենքում եւ Քրեական օրենսգրքում:
Նախաձեռնությամբ, մասնավորապես, առաջարկվում է որոշակիորեն վերանայել Փաստաբանների պալատի ներքին կառավարումը. նախատեսվում է ստեղծել կարգապահական հանձնաժողով: Ստեղծված հանձնաժողովի որոշումները հնարավոր կլինի բողոքարկել Փաստաբանների պալատի խորհրդում:
Ընդլայնվում են Փաստաբանների պալատի խորհրդի լիազորությունները, հատկապես՝ հանրային պաշտպանի գործունեության բնագավառում:
Առաջարկվում է նաեւ բացառել պալատի մեկ անդամի կամ պաշտոնատար անձի միաժամանակ ներգրավումը տարբեր մարմիններում՝ բացառությամբ պալատի նախագահի, եթե վերջինս խորհրդի նախագահն է: Պալատի նախագահը եւ խորհրդի անդամները գործունեության ընթացքում պետք է պահպանեն քաղաքական չեզոքություն եւ զսպվածություն:
Վերանայվում է նաեւ պալատի մարմինների անդամների ընտրության կարգը: Նախատեսվում են անվճար անհատույց իրավաբանական օգնության կառուցակարգերի զարգացում, հանրային պաշտպանության տրամադրման այլընտրանքային եղանակներ: Կվերանայվի նաեւ փաստաբանների ուսուցման եւ որակավորման կարգը:
Գրիգոր Մինասյանի խոսքով՝ նախագիծը քննարկվել է շահագրգիռ կողմերի հետ:
Հանձնաժողովի անդամ Մարինե Ղազարյանը հարակից զեկույցում նշել է, որ ակնկալվում է ընդլայնել պալատի կառավարման կարգը՝ համահունչ դարձնելով ինքնակառավարման սկզբունքներին: Նրա խոսքով՝ առավել արդյունավետ կիրականացվի փաստաբանների կարգապահական պատասխանատվության վարույթը:
Օրենսդրական փաթեթը ստացել է դրական եզրակացություն:
