Այսօր ԱԺ-ում արտահերթ նիստ է հրավիրված, քննարկվում է Վճռաբեկ դատարանի դատավորի թեկնածուի ընտրությունը։ Ըստ սահմանված կարգի՝ Վճռաբեկ դատարանի դատավորների թեկնածուներին ԱԺ-ում պետք է ներկայացնի ԲԴԽ նախագահը, սակայն ԲԴԽ նախագահի լիազորությունները կատարող Գագիկ Ջհանգիրյանի փոխարեն թեկնածուներին ներկայացնում էր ԲԴԽ անդամ Դավիթ Խաչատրյանը։
Պատգամավորի այն հարցին, թե ինչու է նա ներկայացնում թեկնածուներին, Խաչատրյանը պարզաբանեց․ «Գագիկ Ջհանգիրյանը վիրահատության է ենթարկվելու կամ արդեն ենթարկվել է, և այդ առողջական խնդիրների պատճառով ես եմ իրեն փոխարինելու, ուղղակի մինչև այս պահը հայտնի չէր՝ ենթարկվելու է վիրահատության թե չէ, համենայնդեպս այս պահին ժամանակավորապես ես եմ իր պարտականությունները կատարելու»։
Թիվ 1-ը կապ հաստատեց ԲԴԽ խոսնակ Լիլիթ Շաբոյանի հետ, վերջինս մեզ հետ զրույցում նշեց․ «Պարոն Ջհանգիրյանը Երևանի հիվանդանոցներից մեկում է, հետազոտման և բուժման փուլում, դրա շրջանակներում բժիշկները կորոշեն, թե, ըստ անհրաժեշտության, երբ կվիրահատեն: Այլ մանրամասներ փոխանցել չեմ կարող»:
Այն հարցին, թե ի՞նչ առողջական խնդիր ունի, խոսնակը պատասխանեց, որ բժշկական գաղտնիք է։
Մերի Մանուկյան
