Տեխաս նահանգի Սան Անտոնիո քաղաքում լքված բեռնատարում հայտնաբերվել է 46 միգրանտի դի, հայտնում է CNN-ը։ Նույն բեռնատարում գտնվող 16 հոգի փրկվել են։
Հունիսի 27-ին, տեղական ժամանակով ժամը 18։00-ի սահմաններում, բանվորը շտապօգնություն է զանգահարել կայանված բեռնատարից օգնության կանչեր լսելուց հետո, ասել է Սան Անտոնիոյի ոստիկանապետ Բիլ Մաքմանուսը: Բեռնատարի դռները կիսաբաց են եղել, բանվորը ներս է նայել ու տեսել տասնյակ մահացածների։
Բեռնատարում եղել է նաև 16 ողջ մնացած՝ 12 մեծահասակ և չորս երեխա։ Նրանք տեղափոխվել են տեղի հիվանդանոցներ։ Ականատեսների վկայությամբ՝ փրկվածներն ունեցել են ջրազրկման և գերտաքացման ախտանիշներ։ Սան Անտոնիոյում հունիսի 27-ին օդի ջերմաստիճանր եղել է 35 աստիճանից բարձր, բեռնատարում ջուր և օդորակիչ չի եղել։
Գործի քննության շրջանակներում երեք հոգի բերման են ենթարկվել, սակայն, գրում է CNN-ը, դեռ պարզ չէ, թե նրանք ինչպես են կապված միջադեպի հետ։
Սան Անտոնիոյի քաղաքապետ Ռոն Նիրենբերգը կատարվածն անվանել է «սարսափելի մարդկային ողբերգություն»:
Թարգմանությունը՝ Աստղ Խաչատրյանի։
