ԱՄՆ ֆինանսների նախարարությունը հայտարարել է Ռուսաստանի դեմ նոր պատժամիջոցների մասին։ Դրանք վերաբերում են տասնյակ մարդկանց ու ընկերությունների, այդ թվում՝ Մոսկվայի բանկիը, Միացյալ ավիաշինական կորպորացիան, Ռոստեկը և պաշտպանական այլ ձեռնարկություններ։
Բացի այդ, սահմանափակումների տակ են հայտնվել հայտնի հեռուստահաղորդավարուհի Թինա Կանդելակին, պաշտպանության նախկին նախարար Անատոլի Սերդյուկովը և նրա ընտանիքի անդամները։
Ընդհանուր առմամբ, ցուցակում կա 45 ընկերություն և 29 ֆիզիկական անձ։
ԱՄՆ-ը նաև արգելք է դնում Ռուսաստանից ոսկու ներկրման վրա։ Այս մասին ԱՄՆ նախագահ Ջո Բայդենը համաձայնության է եկել G7 երկրների իր գործընկերների հետ Բավարիայում կայացած հանդիպմանը։ Ակնկալվում է, որ շուտով օրինակին կհետևեն Մեծ Բրիտանիան, Ճապոնիան և Կանադան:
Կգնա՞ն արդյոք եվրոպական երկրները՝ Ֆրանսիան, Գերմանիան և Իտալիան նման քայլի, դեռևս հայտնի չէ։ Անցյալ շաբաթ Եվրախորհրդի ղեկավար Շառլ Միշելը հայտարարել էր, որ ԵՄ-ն պատրաստ է դիտարկել ռուսական ոսկու ներկրման վրա էմբարգոյի հնարավորությունը։ Արգելքը կանդրադառնա նոր խմբաքանակների վրա և չի ազդի արդեն գնված մետաղի վրա:
Բայդենը նշել է, որ ոսկին ռուսական արտահանման կարևոր ապրանք է, որը Ռուսաստանին բերում է «տասնյակ միլիարդավոր դոլարներ»։ Բրիտանական իշխանությունները ճշտել են, որ վերջին ամիսներին ռուսական էլիտայի համար ոսկու արժեքը զգալիորեն աճել է։ Գործարարները, իբր, սկսել են ձուլակտորներ գնել՝ փորձելով պահպանել իրենց կապիտալը Արևմուտքի պատժամիջոցների պայմաններում:
Աղբյուրը՝ Svoboda.org
