Ա․ Միրզոյանը հեռախոսազրույց է ունեցել Կանադայի իր գործընկերոջ՝ Մ․ Ժոլիի հետ

Հայաստանի արտգործնախարար Արարատ Միրզոյանը այսօր հեռախոսազրույց է ունեցել Կանադայի իր գործընկերոջ՝ Մելանի Ժոլիի հետ:

Հայաստանի ատրգործնախարարության փոխանցմամբ՝ Միրզոյանը զրուցակցին է ներկայացրել նաև Հարավային Կովկասում տիրող իրավիճակն ու ընթացիկ զարգացումները, ինչպես նաև առկա անվտանգային մարտահրավերները: Անդրադարձ է կատարվել Հայաստանի և Ադրբեջանի միջև հարաբերությունների կարգավորմանը, Լեռնային Ղարաբաղի հակամարտության խաղաղ կարգավորման գործընթացին՝ այս համատեքստում կարևորելով ԵԱՀԿ Մինսկի խմբի համանախագահության դերը:

Արարատ Միրզոյանն ու Մելանի Ժոլին գոհունակությամբ են արձանագրել երկու երկրների միջև տարբեր ոլորտներում արդյունավետ համագործակցությունը և ընդգծել փոխադարձ հանձնառությունը՝ ջանքեր գործադրելու հայ-կանադական հարաբերությունների հետագա խորացման ուղղությամբ:

Երկուստեք կարևորվել է Հայաստանի կառավարության կողմից իրականացվող ժողովրդավարական բարեփոխումների գործընթացում կանադական կողմի հետ փորձի փոխանակման և համատեղ ծրագրերի իրականացման շարունակականությունը: Այս համատեքստում նախարար Միրզոյանը ողջունել է Եվրոպայում և Եվրոպական Միությունում Կանադայի հատուկ բանագնաց Ստեֆան Դիոնի՝ «Աջակցություն հայկական ժողովրդավարությանը» խորագրով զեկույցը, որը կարևոր դրույթներ է պարունակում՝ հայ-կանադական հարաբերությունների զարգացման նոր հնարավորությունների նախանշման առումով: