Ինչպիսի պատկերացում ունեք համակարգի կառուցվածքի մասին, որպեսզի ՀՀ իրավական համակարգը մաքսիմում արդարություն ապահովի: Այս մասին Ազգային ժողովում ՀՀ գլխավոր դատախազի թեկնածու Աննա Վարդապետյանից հետաքրքրվեց «Քաղաքացիական պայմանագիր» խմբակցության պատգամավոր Խաչատուր Սուքիասյանը և խնդրեց ներկայացնել կառուցվածքի իր տեսլականը:
«Իհարկե մենք հաշվի ենք առնում այն հանգամանքը, որ վերջին 20 տարում կրթության հարթակները բավարար կրթված մասնագետներ չեն տվել ՀՀ իրավական համակարգին»,- ասաց պատգամավորը: Նա նաև անընդունելի համարեց, որ փորձաքննությունները տևում են մեկից երեք տարի, և այդպես արդարության աստիճանը չենք կարող բարձրացնել:
Աննա Վարդապետյանը նշեց, որ կառուցվածքի ամեն մի փոփոխություն պահանջում է ժամանակ և հետաձգում է քրեական գործերի քննությունը: «Ես կարծում եմ, որ կառուցվածքի եղած իրավիճակը բավարար է արդյունավետ գործելու համար: Այստեղ ես պատկերացնում եմ ավելի շատ առօրեական վերահսկողական մեխանիզմների խորացումը»,- ասաց նա և նշեց, որ համակարգը ցնցումների տանել և փոփոխություններ անելը արդյունավետ չի լինի:
Խաչատուր Սուքիասյանը անդրադարձավ նաև «սևազգեստ մայրեր»-ի գործին, և հարց բարձրացրեց, թե եթե բոլոր նախկին քննական գործընթացները լինեին տեսաձայնագրված, մենք այսօր որքան հեշտությամբ կկարողանայինք հետ գնալ և պարզել որտեղ է սխալը եղել: «Գուցե մեր բոլոր քննությունները տեսախցիկի տակ լինեն, որպեսզի ապագայում օգնեն արդարադատության աստիճանը բարձրացնելու հարցում, գուցե այլ գործիքներ կիրառենք, արդիականացնենք մեխանիզմները»,- հարցրեց պատգամավորը:
Աննա Վարդապետյանը համաձայնեց, որ քննչական գործողությունների կատարման արդիականացման անհրաժեշտության հետ: «Մենք այսօր շատ հենվում ենք թղթի վրա, պետք է ավելի շատ հենվենք էլեկտրոնային ապացույցների վրա»,-ասաց նա։
