Թուրքիայում հայտնաբերել են կապիկների ծաղկի առաջին դեպքը: Այս մասին հայտնել է առողջապահության նախարար Ֆահրեթին Քոջան։
«Մեր հիվանդներից մեկի մոտ հայտնաբերվել է կապիկի ծաղիկ, հիվանդը 37 տարեկան է, ունի իմունային համակարգի անբավարարություն, նա գտնվում է մեկուսացման մեջ: Այլ դեպք չի հայտնաբերվել: Ինչպես գիտենք, այս հիվանդությունը չի փոխանցվում օդակաթիլային ճանապարհով, բայց փոխարենը վարակիչ է սերտ ֆիզիկական շփման դեպքում»,- գրել է նա «Թվիթեր»-ում։
Կապիկի ծաղիկը հազվագյուտ վիրուսային վարակ է, որը կարող է փոխանցվել նաև մարդկանց: Հիվանդությունը սովորաբար թեթև է, և մարդկանց մեծամասնությունը ապաքինվում է մի քանի շաբաթվա ընթացքում, սակայն ոմանց մոտ կարող են բարդություններ առաջանալ: Սկզբնական ախտանշանները ներառում են ջերմություն, գլխացավ, մկանային ցավ, մեջքի ցավ, այտուցված ավշային հանգույցներ, դող և հյուծվածություն: Ցան կարող է զարգանալ, որը հաճախ սկսվում է դեմքի վրա և այնուհետև տարածվում մարմնի այլ մասերում։ Այն փոխվում է և անցնում տարբեր փուլերով՝ մինչև քոսի վերջնական ձևավորումը, որը հետագայում թափվում է։
Մարդկանց ծաղիկով վարակվելու առաջին դեպքը գրանցվել է 1970 թվականին։ Հետագայում այս ախտորոշումը մարդկանց մոտ բազմիցս եղել է, սակայն, որպես կանոն, վարակվածները եղել են Աֆրիկայում։ Վիրուսի փոխանցումը, ըստ բժշկական դիտարկումների, սովորաբար տեղի է ունեցել կենդանուց մարդուն:
Վերջին շրջանում աշխարհի 50-ից ավելի երկրներում այս հիվանդության ավելի քան 5100 դեպք է հայտնաբերվել, մինչդեռ մասնագետների համար վարակի տարածման ուղիներն ամբողջությամբ պարզ չեն։ Առողջապահության համաշխարհային կազմակերպության արտակարգ իրավիճակների կոմիտեն ավելի վաղ ընդունել էր կապիկի ծաղիկը որպես համավարակի բռնկում:
Հայաստանում կապիկի ծաղկով վարակման դեպքեր առայժմ չկան:
